For di basta tempo UPP a bin ta denuncia posibel actonan inapropia den camber di operacion di HOH, na unda despues cu un investigacion forensico a tuma lugar, tanto AZV, como HOH, y minister kier purba di sconde e berdad pa e pueblo.
Awor informacionnan a yega cerca nos cu tin un otro caso di tipo di actonan asina lo a tuma lugar na IMSAN cu un medico cu tabata traha eynan.

Manera cu UPP a bin ta bisa caba, algun siman pasa un agente policial corectamente a ser deteni pa motibo cu e lo a comete actonan inapropia cu algun bonnan di cuminda y cu te hasta probablemente e lo bay perde su trabow.

Parce cu esnan laborando den mundo medico, principalmente e mediconan mes, ta haña un trato preferencial ora cu supuesto actonan inapropia - kizas na unda sumanan hopi mas grandi ta wordo malversa - ta wordo descubri.
E mediconan involvi SI ta parce di ta get-away cu un acuerdo di "terugvordering", y no ta haci un denuncia oficial. Pues ta hunga Ministerio Publico y Huez alabes.

Pa loke ta trata IMSAN, supuestamente aki tambe lo tin casonan a tuma lugar cu simpelmente ta actonan cu mester ser denuncia.

Ta p'esey UPP kier a haci e siguiente preguntanan na tanto AZV, como na IMSAN y na e minister di Salud:
1. Ta berdad cu tin un of mas mediconan cu a ser retira pa motibo cu nan lo a comete actonan "inapropia"?
2. Si e contesta ta afirmativo, por informa di cuanto medico nos ta papia y di cuanto placa?
3. Ora cu un medico "schrijf voor" medicina pa su mes, busca esaki na botica cu su carchi di AZV, pa despues bende esakinan na "niet verzekerden", esaki no ta un acto penal?
4. Si esaki sosode, boso no ta kere cu esaki mester a ser denuncia?
Of esaki tampoco ta cay bow di "FRAUDE" manera e actonan inapropia cometi door di dos of mas specialista na HOH?
5. Boso no ta kere cu e pueblo como pagador di prima di AZV, tin derecho di sa nomber of nombernan di e mediconan involvi y e cantidad di placa involvi?
6. Sindicatonan y gremio comercial, cu tin un representante den e Raad van Toezicht di IMSAN, ta na altura di e caso of casonan aki?
7. Si ta afirmativo dicon no a haci denuncia, of tambe kier tapa esaki pa pueblo?

Si no tin nada di sconde, bin padilanti y papia, sino UPP lo haya su mes obliga di bay menciona nomber atrobe, y posibelmente haci denuncia tambe!
J'ACCUSE!!

Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, october 6, 2015

Expresionnan haci den e articulo aki no necesariamente ta refleha opinion di ArenaPoliti.co