ORANJESTAD – Den un declaracion duna e siman aki, Prome Minister Mike Eman a expresa cu su Gobierno ta evaluando con ta bay desaroya e tereno cu a keda bashi despues cu Bouw Maatschappij Aruba a cera su portanan na Dakota. E ta un tereno basta grandi y den pasado caba Parlamentario Marlon Sneek a presenta un plan na Gobierno. A papia di un mini cancha deportivo. Sinembargo directiva di Centro di Bario Dakota tabata desea pa e mini cancha aki wordo construi riba nan tereno pa cual Gobierno ta pensando riba un cambio.

Hunto cu Team BoBario, di Ministerio di Asuntonan General, Prome Minister Eman a evalua pa construi un piscina comunitario na Centro di Bario Dakota. Pero awor ta pensando pa construi e proyecto aki di un piscina olimpico comunitario riba ex tereno di BMA.

Prome Minister Eman ta hopi entusiasma pa riba e tereno aki construi un proyecto di deporte y recreacion cu lo contribui na e ambiente y desaroyo positivo di Dakota. Un piscina y mini canchanan deportivo, Eman a bisa, ta crea un entusiasmo bou di e hobennan pa dedica nan tempo na aspectonan positivo. “E ta yuda nos kita hobennan di riba caya,” el a bisa. Principalmente den e pensamento comunitario,deporte y recreacion sano pa hobennan ta hunga un rol importante.

E mandatario ta hopi positivo pa mira con organisacionnan deportivo ta reacciona riba iniciativanan di Gobierno y ta cuminsa traha cu hopi entusiasmo riba e vision cu tin. Esaki  ta duna Gobierno hopi smaak pa tin partnernan asina positivo cu tambe ta tuma iniciativa pa desaroya nan organisacion. Eman a duna dos ehempel, di Britania y RCA cu ta trahando duro pa mehora nan facilidadnan, riba nan mes. “Esnan cu ta traha riba canchanan deportivo y clubnan ta haci un trabou hopi importante,” Eman a bisa.

Expresionnan haci den e articulo aki no necesariamente ta refleha opinion di ArenaPoliti.co