Prome Minister Eman di bishita den bario pa informa su mes di e utimo desaroyonan den e proyecto 

ORANJESTAD – Bushiri a duna Prome Minister Mike Eman un resepcion caluroso na momento cu el a yega den e bario pa wak pa su mes e ultimo desaroyonan relaciona cu e veld di yerba den construccion na e bario. Prome Minister tabata den e bario, compaña pa funcionarionan di diferente departamento cu ta tuma parti den Accion di Bario. Remarcabel di e bishita aki tabata con entusiasma tanto mayor como hoben ta cu e mini veld, cu ta wordo realisa hunto cu FCCA.

“Nos ta hopi contento di mira cu organisacion deportivo of social, formando un ekipo hunto cu FCCA,  Gobierno y BoBario pa logra e mini canchanan deportivo den tur bario,” Prome Minister Eman a expresa na final di su bishita na Bushiri.

Sr. Eman a menciona esaki pasobra despues di e mini cancha deportivo na Jaburibari y Brazil, por a constata cu e organisacion deportio RCA tambe a traha riba su mesun iniciativa un di e canchanan aki cu a keda inaugura recientemente. Esaki a sosode den e mesun siman cu tabatin groundbreaking pa esun cu ta den construccion na Bushiri.

“E entusiasmo den Bushiri ta grandi, specialmente cerca e hobennan cu ta pura pa e veld keda cla,” Eman a bisa. Na momento di e Accion di Bario, representantenan do directiva di Centro di Bario Dakota tabata di bishita pa tambe mira con e mini cancha ta desaroyando, ya cu e ta algo cu nan ta desea pa haya den nan bario tambe.

Ademas di e mini veldnan, Prome Minister Mike Eman hunto cu su grupo di boluntario practicamente tur fin di siman ta pasa duna un man na un cancha deportivo unda tin trabou pa haci. E boluntarionan ta busca material necesario como donacion y nan ta pone man na obra. Asina a logra construi of drecha tribuna y otro infrastructura na varios veld deportivo y tambe na e Club Bushiri di Karting, unda a yuda embeyece e facilidad y drecha rond e tereno pa caredanan internacional por a wordo teni. Proximamente ta bay duna un man na e organisacion di Arsenal.

Durante e bishita den bario di Bushiri Eman a anuncia cu e proximo mini canchanan deportivo ta wordo construi na Madiki, Cura Cabay y Seroe Patrishi. “Nos ta hopi contento cu tin asina hopi interes pa e canchanan aki cu di yerba artificial cu ta hacie asina atractivo pa e muchanan,” sr. Eman a bisa.  

Expresionnan haci den e articulo aki no necesariamente ta refleha opinion di ArenaPoliti.co