“UNION Y DETERMINACION TABATA E YABI PA EXITO” 

STA. CRUZ – Durante e prome conferencia di prensa di MEP pa anja 2016, lider di MEP a duna di conose cu e anja aki ta uno hopi especial, en bista di conmemoracion di 30 anja di Status Aparte di pais Aruba.

“Ta hopi cosnan a pasa durante e 30 añanan di autonomia di nos pais.  Na e momento cu Aruba a drenta su Status Aparte Aruba tawatin su retonan economico pasobra Lago a dal su portanan sera net prome, y hopi tabata esnan cu a scohe pa bai biba den exterior debi na e incertidumbre. Sinembargo tabata tin un union den nos pueblo y un determinacion pa hasi di e Status Aparte aki un exito. E union y deterinacion cu nos pueblo a demostra e tempo ey a hasi di e Status Aparte un exito grandi, cu a trece hopi bienestar pa nos pais. Pero e exito, e union y determinacion aki no a bin sin mas, ela wordo inspira y guia door di un gran lider, Betico Croes (efm) pero lamentablemente e la fayece un anochi promer cu nos a drenta nos status di pais. El’a construi e cas pa nos por cria nos yiunan den libertad, el’a entrega nos e yabi, sinembargo, e mes no por a gosa di e libertad aki.

Esnan cu a lucha hunto cu Betico, conose e historia, sinembargo tin un generacion cu no conose esaki. Esnan cu a bin biba na Aruba despues di 1986 tampoco conose e historia di nos Status Aparte. E hecho cu cada biaha cu un Eman a goberna nos pais, a purba falsifica nos historia, tampoco a contribui pa e historia real di nos Status Aparte ta conosi ampliamente. Pesey ta hopi importante pa documenta e historia real di nos Status Aparte, y nos di MEP lo cuminsa traha riba esey awor mes. Esey ta nos compromiso cu nos pais.

Awe nos por mira cu Status Aparte a trece bienestar, progreso y prosperidad pa nos pais. Ohala cu e mesun sentimento di union y determinacion di e tempo ey por inspira nos pa hiba nos pais atrobe riba e caminda di progreso. Masha pabien na Aruba pa cumpli 30 aña di Status Aparte” ta palabranan di lider di MEP Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co