Na caminda pa tratamento di presupuesto 2016! 

Manera recientemente anuncia door di Presidente di Parlamento, sra. Marisol Lopez-Tromp, diahuebs awor lo cuminsa cu tratamento di presupuesto 2016, un presupuesto cu ya tin un retraso di 5 luna y caminda for di awor caba por anticipa cu e 13 parlamentarionan di AVP ciegamente lo bay grita “voor” y aproba e presupuesto aki den un frega di wowo. Na prome instante ta premira cu presupuesto 2016 lo bay tin un deficit di 103 miyon florin y cu gran probabilidad esaki lo aumenta ora cu Gabinete Eman bolbe bin cu su presupuesto supletorio na final di e aña aki. Cu e deficit aki nos debe nacional lo sigui aumenta den 2016 y lo surpasa grandemente 4 biyon florin y esaki sin conta acerca e gastonan di e proyectonan PPP (Pa Pueblo Paga). 

AVP no ta kere den vivienda social 
Mescos cu e ultimo 6 presupuestonan cu Gabinete Eman ya a entrega, ta lamentabel cu e biaha aki gobierno no tin placa adicional pa hinca den proyectonan social cu ta na bienestar di esnan menos pudiente den comunidad. Gabinete Mike Eman no ta tuma ni un porciento di ehempel di locual e gobierno di MEP a logra durante e periodo di 2001 pa 2009. Hecho ta cu den cada presupuesto cu gobierno di MEP a aproba durante e afamado 8 añanan, nos por a mira cuanto placa a ser hinca den presupuesto pa logra construi casnan social pa esnan cu tin necesidad di esaki. Nos por a mira con Gabinete Oduber a ehecuta cabalmente e siguiente proyectonan di vivienda social: 190 cas social na Bushiri, 120 cas na Cura Cabay, 60 cas na Jaburibari, 30 cas na Seroe Patrishi y e prome fase di 50 cas na Palisiaweg. Tambe a construi casnan adapta pa esnan cu limitacion na Sjabururi, Ambiente Feliz y Jaburibari. 

Hipocrecia di marca mayor
Historia a demostra cu no ta durante e 8 añanan aki so MEP a percura pa construi casnan social, pero den tur gobierno di MEP – tanto prome como despues di entrada di Status Aparte – casnan social a ser construi door di FCCA y cual fundacion a nace bao di gobierno di MEP, pero cu gobierno di AVP tabata a punto di laga e fundacion aki sangra y muri na 2001 den e escandalo di Interbank. Ta un berguensa pa constata cu nunca un gobierno “cristian democrata” di AVP a yega di construi casnan di pueblo pa esnan di menos recurso den comunidad. Awor durante e ultimo 6 añanan den un forma hipocrita nan ta gaña tira un paar di klinkers aki aya dilanti e casnan aki, planta algun mata den vecindario y haci como sifuera cu tur e casnan aki ta obranan di nan gobernacion. Te hasta e otro fasenan di e proyecto di casnan social na Palisiaweg (total e mester a bira 150 cas) cu gobierno di MEP a laga atras na 2009 a ser boycotia pa Gabinete Eman.

Maltrato na nos grandinan
Sinembargo no ta casnan social so e gobierno di AVP no a construi durante e ultimo 6 añanan, pero ningun cas di anciano a mira luz di dia durante e gobernacion aki. Contrario na esaki cu orguyo nos por mira con durante Gabinete Oduber un Centro di Cuido pa nos grandinan a ser construi na Palisiaweg na San Nicolas. Tambe a renoba y expande Sint Michael Paviljoen y a construi Thuiszorg na Jaburibari. Tur esakinan tabata proyectonan cu a costa hopi placa pero tabata hinca den tur e presupuestonan durante gobernacion di MEP. Pero kico nos por a mira durante e ultimo 2 añanan? Gabinete Mike Eman a para completamente e subsidio na Thuiszorg y tambe a corta drasticamente den e subsidio na SABA, lagando tur nos grandinan desampara, caminda nan tin cu bebe stropi na lugar di juice saludable y mas cu tur a laga e grandinan sin airco. Pues ta un berguensa cu diahuebs awor un otro presupuesto lo wordo trata, caminda no tin ningun placa disponibel pa construi casnan social y tambe casnan di anciano, pero tin tur placa di mundo si pa Mike Eman sigui viaha, paga coordinadornan, paga huurmento di edificionan na compinchinan politico y tambe abogado y consultantnan. Pues e adagio di partido AVP ta, pakico Mike Eman tin cu preocupa su mes cu e personanan di menos recurso den comunidad, si e mes ta biba den tur luho y riba custia di pueblo caba?

Expresionnan haci den e articulo aki no necesariamente ta refleha opinion di ArenaPoliti.co