E aña aki e digno pueblo di Aruba ta di fiesta pa varios motibo. Como un pueblo chikito nos antepasadonan a lucha pa un Aruba Autonomo y Liber den Reino Hulandes. Aruba ta celebrando 30 aña di Status Aparte, tambe 40 aña di nos Bandera y Himno 'Aruba Dushi Tera'. Dia 1 di Januari 2016 nos a cumpli 30 aña como un pais Autonomo den Reino Hulandes. Ta importante duna reconocimento na e arkitecto di tur esaki. Parlamento di Aruba, e organo mas halto di nos pais, unanimamente a duna Gilberto François Betico Croes e titulo Libertador di Aruba. Dia 25 di Januari, nos pueblo ta recorda e fecha di nacemento di nos lider inmortal Gilberto François (Betico) Croes den feliz memoria. Si Betico ta na bida, e lo a cumpli 78 aña. Un lucha cu no tawata facil pero cu e bendicion di Dios y e apoyo di nos pueblo nos Libertador a logra cu su partido MEP. Ta importante cada generacion Arubano refleha riba e bida y logronan di Gilberto François (Betico) Croes riba su Dia cu ta cada Januari 25. Nos no por sin celebra su fecha natal pasobra ta e dia aki e strea cu a nace riba un 25 di januari, 78 aña pasa cu a cumpli cu e pueblo di Aruba. Gilberto François (Betico) Croes, e homber cu apesar di tur boycott, contratiempo y obstaculo a keda insisti, persisti y tabata convenci di su vision. Cada un di nos biba na Aruba por sinti nos mes orguyoso di yama nos mes Arubano y esaki ta danki na Betico. Nos no ta den un posicion humiyante. Nos pueblo tin su simbolonan di union y libertad: Un Bandera, Un Escudo, Un Himno pero mas cu tur cos un pais Liber y Autonomo. Nos yiunan tin e oportunidad di biba den un territorio chikito pero bunita cu tur e libertad cu Dios a duna nos. Esaki ta un derecho universal di tur pueblo. Betico a sacrifica y entrega su bida pa un lucha cu lo trece e felicidad colectivo pa nos pueblo: Aruba un pais Autonomo den di Reino Hulandes. E homber cu a sacrifica su hogar pa el a lucha pa e hogar grandi cu yama Aruba. E homber cu a declara cu e felicidad cu e ta desea pa su propio yiunan ta e felicidad cu e ta desea pa henter nos pueblo. E homber cu desde cu e tabatin 33 aña a sacrifica su ultimo 15 añanan di bida, pa e por a dedica su mes na e lucha di un Aruba Liber, doño di su propio destino. E homber cu destino a haci cu e mester a bandona e partido politico na cual inicialmente e tabata afilia y funda su propio partido politico di 9 di februari 1971 pa e por continua cu loke el a yama su mision di bida, esta di dirigi Aruba den su lucha pa ta un pais liber. Betico tabata e lider di e masa cu tabata apela riba e sentimiento di patriotismo y cu constantemente tabata mobilisa e masa aki. Un y tur por corda e manifestacion masal den Wilhelminastadion na 1973, e marcha di flambeu na 1975, e inauguracion di himno y bandera na 1976, e Referendum na maart 1977, e demonstracionnan durante Augustus Scur 1977 y e yegada di e delegacion Arubano na maart 1983 despues di a logra e Status Aparte durante e Conferencia di Mesa Rondo. Na tur e ocasionnan aki Betico tabata e figura principal cu tabata inspira e multitud presente cu su discursonan impresionante. Betico Croes na varios ocasion a declara cu si su persona y su partido mester cana na margen di ley, e lo haci esaki basta cu e logra e ideal di e pueblo Arubano, esta e Status Aparte. Como pueblo, ban bini hunto pa celebra un biaha mas e fecha natalicio di un ser humano, yiu, esposo, tata, ruman, primo, amigo. Ban practica deporte, arte, actividadnan social/familiar cu Ideal di Betico den nos curason. Ban ta agradecido pa tur e prosperidad cu su vision a duna nos cu e mes no por a wak. Cu orguyo y honor Aruba ta celebra e fecha natalicio di nos gran estadista y Libertador Gilberto François (Betico) Croes. Ta suplica un y tur pa corda hisa nos bandera riba e dia aki.

Expresionnan haci den e articulo aki no necesariamente ta refleha opinion di ArenaPoliti.co