Articulo…..analisando 30 anja Status Aparte !! 

STATUS APARTE COMO FASE TRANSITORIO PA INDEPENDENCIA ENTRANTE 1 DI JANUARI 1996 !! 

Ta 30 anja pasa cu Aruba ta den un posicion cu ta worde jama ‘nos Status Aparte’. Pa analisa esaki bon PPA ta di opinion cu nos mester tene cuenta cu tin un diferencia cardinal den e forma cu nos mester wak nos historia(30 anja) cu nos a pasa como pais den Reino Hulandes.

Na prome lugar Aruba a pasa den un ‘fase transitorio’ na caminda pa su Independencia cu basa riba e logro na Hulanda na 1983, Aruba lo mester a bira Independiente 1 di januari 1996 (20 anja pasa). Ora a drenta Status Aparte Aruba pues tabata cu un fecha di Independencia riba su cabez !! Anto mester anota cu Aruba NO a logra ningun garantia necesario pa por drenta e Independencia aki !! Gabinete H Eman 1 no a dedica atencion na prepara pa futuro estatal di Independencia. Gabinete Oduber forma pa MEP, PPA y ADN si a dicidi di pone e asunto aki riba mesa cu Hulanda pidiendo pa un lista di ‘garantia’ cu nan tabata mira como necesario pa Aruba por drenta su Independencia na un forma responsabel. Hulanda na su turno a contesta cu nan no lo duna Aruba ningun garantia pa su Independencia…..Aruba lo mester prepara durante e anjanan cu falta y tuma e paso aki. Esaki tabata e caminda pa Canossa cu PPA a splica cu Aruba lo a pasa den ora a accepta Independencia SIN a negocia e garantianan pa esaki. No cu PPA tabata di acuerdo cu independencia. PPA durante epoca 80 tabata pa un status aparte cu no ta mara na Independencia. Entodo caso ora cu Hulanda a nenga e garantianan gabinete Oduber a dicidi cu lo ta miho pa Aruba keda cu su Status Aparte y no ejecuta e independencia cu a worde palabra na 1983. Pero esaki a trece cunele tambe cu Hulanda a pone un racha di condicion pa Aruba por a ‘schrap’ e fecha di independencia….e condicionan aki bo por hanjanan den e documento cu a worde firma na oktober 1993 door di Prome Ministro Nelson Oduber y Henny Eman y tabata ensera entrego tambe di cierto parti di nos autonomia bek den man Hulandes. Un vez mas esaki tabata e caminda di Canossa ..cu mester a worde kana una vez cu a jena fecha di Independencia SIN cu garantianan a worde negocia !!. Entodo caso e prome 8 pa diez anja a tuma lugar bao di pression di tempo …pa regla esaki prome cu e fecha di Independencia bati na nos porta… y gabinete Oduber(MEP-PPA-ADN) a carga e responsabilidad politico pa e ‘schrapmento’ di e fecha di Independencia.

Na di dos lugar Aruba tabata confronta un epoca SIN un refineria !! Y e prome gobierno mester a dedica atencion na esaki. Dios gracias cu sr. Juan E. Yrausquin q.e.p.d. (PPA) a prepara Aruba pa e epoca cu LAGO lo por sera su portanan !! Ejecutando su vision economico Juancho a bisa repitida vez….nos mester di turismo pa prepara pa e momento cu LAGO sera su portanan….! Locual a worde contesta pa e liderato di AVP e tempo ey…..’ta kabritonan di noord lo bai drumi den e hotelnan’. Entodo caso Aruba tabatatin un fundeshi di 2600 kamber di hotel riba cual e gobierno por a sigui traja/expande. Un desaroyo lamentable cu por worde considera e prome escandalo serio bao di nos Status Aparte ta ora Prome Ministro Henny Eman a firma pa duna ‘garantia’ pa varios hotel por a worde construi unda pueblo ta para garantia y no esnan cu ta construi e hotelnan aki …e parti contra reglanan di ‘good governance’ tabata cu PM Ministro Henny Eman a firma pa garantianan dentro di 24/48 ora sin cu el a pidi conseho di departamentonan cu normalmente mester worde envolvi. Consecuencia di esaki tabata cu algun hotel a worde construi pero varios a faya….y Aruba a keda cu un debe grandi cu a worde jama e ‘garantia problematiek’ di alrededor di 600 million florin cu a keda cologa riba nos pueblo te ora cu bao di gabinete Oduber/ministro Nilo Swaen a logra un acuerdo cu Aruba lo paga hopi menos locual a resulta un 250 million florin.

STATUS APARTE DEFINITIVO DEN REINO HULANDES TE ORA E PUEBLO DICIDI OTRO !!

E gobernacionan cu a sigui despues di e periodo 1986 pa 1994 por a goberna Aruba teniendo cuenta cu Aruba su problemanan diversifica SIN cu tabatatin un fecha di Independencia mas riba lomba di pueblo Arubano. Cu otro palabra pa ta cla….. e logro di Conferencia di Mesa Rondo a duna Aruba un Independencia y na caminda pa esaki un status aparte di DIEZ anja !! Mientras e consecuencianan di a kana e caminda di Canossa a duna Aruba un status aparte (entregando autonomia) pero Aruba a keda cu un Status Aparte ‘definitivo’ cual ta logro di gabinete Oduber (MEP-PPA-ADN).

Si analisa e ultimo 20 anja pa locual ta maneho financiero, maneho economico, maneho educacional, maneho social nos conclusion ta lo sigiente.

Aruba a conoce un maneho financiero cu grandemente no tabata basa riba principionan di ‘good governance’ pesey e debe Nacional di Aruba a crece for di 400 miljon cu Aruba a hereda di Antiyas Neerlandes te cu 2 billion na 2009 y a aumenta ‘dramaticamente’ pa 4 billion y ainda falta !!

Aruba su maneho economico tabata uno relativamente ‘zwak’ !! Conclussion di PPA den esaki ta cu nos a perde nos refineria(cu lo por habri dentro di poco !!) y Aruba no ta logra usa su instrumentonan economico pa crea un di tres of di cuatro pilar economico lamentablemente !!

Aruba su maneho di Ensenansa y Educacion no tabata exitoso !! Esaki nos ta mira ora nos analisa e cifranan di e resultadonan annual pero mas ainda ora nos tuma nota cu 29 anja largo Aruba NO a cumpli cu e norma di UNESCO cu 6% di bo entrada nacional mester worde inverti den Ensenansa anualmente !! E averahe di Aruba su gobernacionan ta 4.5 % !! Locual ta di lamenta !!

Aruba apesar di a logra un AZV ……pa nos trajadornan…no a logra tene cuenta cu un maneho social laboral cu a reparti e progreso arubiano durante anjas realmente cu e clase trahador. Rapport ILO di 2005 ta indica esey grandemente. Aruba segun ILO ta usa un sistema cu ta ‘crea pobreza y ta mantene pobreza’ pero lamentablemente e diferente gobernacionan cu Aruba a conoce no a dedica atencion na e punto important aki.

Finalmente Aruba a entrega su derecho primordial di ta ‘baas den su propio cas’ na augustus anja pasa ora 13 miembro di parlamento a aproba e rol di C.A.F.T. for di Corsow pa domina y maneho Aruba financieramente….Hopi Tristo !! Bao di e realidad aki cu hopi kier lubida y/of sera wow pele …ta celebra e Status Aparte e anja aki !! Entodo caso pabien na nos pueblo pero analisa y realisa cu tin hopi cos pa cambia pa mehora futuro di nos pais !!
PPA lo bin bek riba e materia di 30 anja di nos Status Aparte !!

Aruba 16 di maart 2016
Lider Politico di PPA
BENNY NISBET

Expresionnan haci den e articulo aki no necesariamente ta refleha opinion di ArenaPoliti.co