CFT den su ultimo rapport a elabora riba e proyectonan Private Public Parterschip (PPP) cu Gobierno ta bin ta haciendo ultimo tempo. Den e rapport CFT a indica cu Gabinete Eman a haci demasiado uso di PPP cu e consecuencia cu mester pone un plafond pa no sigi cu mas proyecto asina ya cu lo bira dificil pa por paga e gastonan di PPP bek. Cu e proyectonan di edificio pa DOW/DIP, e Hospital Nobo, Green Cooridor y Watty Vos Boulevard, ya caba Gobierno a tuma demasiado gasto riba su lomba cu mester bay wordo paga den e proximo 30 aña, cu consecuencia cu atrobe no ta resta espacio financiero pa traha e school di HAVO VWO na Noord.

Un lista largo di proyecto PPP 
Hopi biaha Minister Eman ta gaba cu su lista largo di proyecto PPP den cual ta figura e Hospital, Green Corridor, Watty Vos Boulevard, edificionan di MFA, edificio di John F Kennedy pa auditorium y departamento di enseñansa y e school pa MAVO HAVO VWO na Noord. Pero te cu awor ta e proyectonan di Hospital, Green Corridor, Watty Vos Boulevard y e edificionan di MFA so tin prioridad y e school pa HAVO VWO na Noord mes cu ta un prioridad grandi pa nos Pais, pa e habitantenan di Noord y nos hobennan en general, no tin fin di wordo traha. Y awor cu CFT den su rapport a mustra cu Gabinete Eman a caba cu e espacio financiero pa paga e gastonan di e PPP bek, e school di HAVO VWO atrobe no lo wordo traha.

Tram enves di school na Noord 
No ta promer biaha cu Gabinete Eman ta pone prioridad robes na fondonan publico. Na 2009 ora Minister Eman a yega na poder ela haya placa cu MEP a recupera di Plant NV y cu a wordo hinca den e fondo di FDA. Eyden tabata tin 29 miyon florin reserva pa traha un school HAVO VWO na Noord. Pero Minister Eman hunto cu e Staatssecretaris Hulandes Bijleveld a cambia destino di e fondonan aki y a destine pa cumpra tram pa core den Oranjestad, cu consecuencia cu e school na Noord no a wordo traha mas. Despues pa tene Pueblo di Noord na linia, a bisa cu na juni 2014 lo cuminsa traha e school pa MAVO HAVO VWO na Noord den forma di un proyecto PPP cu lo ta un inversion di 18 miyon pagando bek den 25 aña. Pero e ultimo rapport di CFT a mustra bon cla cu Gabinete Eman a abusa di proyeto PPP cu consecuencia cu no tin placa mas pa por bay paga pa laga traha e school na Noord den forma di PPP.

Inversion den beton cu asfalt lagando enseñansa sin placa 
Ta lamentabel cu Gabinete Eman ta laga ehecuta proyecto PPP solamente den inversion den beton cu asfalt lagando enseñansa mes sin placa. Pesey ta masha remarcabel cu Minister Hooyboer poco dia atras den prensa ta splica cu lo busca manera pa drecha school por medio di proyecto PPP. Sea Minister Hooyboer ta gania Pueblo of e mandatario no conoce e contenido di e rapport di CFT den cual nan ta splica bon cla cu Gabinete Eman a abusa cu proyecto PPP den asfalt y beton y no ta resta espacio financiero pa inversion den enseñansa, pa drecha school of pa traha e school pa HAVO VWO na Noord.
27 juni 2016

Expresionnan haci den e articulo aki no necesariamente ta refleha opinion di ArenaPoliti.co