Nos a tuma nota di e comunicacion por escrito cu Minister Mike de Meza a manda pa Parlamento di Aruba referente e status di e proceso pa logra e reapertura di e refineria, e contractnan cu mester bin den Parlamento pa wordo tratá y e formalisacion di esaki, unda a notifica Parlamento cu ainda Gobierno di Aruba no tin un acuerdo final cu Valero Energy Corporation. 

Nos kier hasi uso di e oportunidad aki pa manda un mensahe pa Valero Energy Corporation cu nos ta spera cu nan lo usa nan bon huicio y duna nan bon cooperacion pa asina yega na e acuerdo final cu Gobierno di Aruba pa asina por continua cu e REAPERTURA di e refineria di Aruba conforme boluntad di nos Digno Pueblo. 

Internamente nos a haci un apelashon riba Lider di nos Partido Evelyn Wever Croes pa usa su contactonan cu Valero Energy Corporation pa e por lobby pa Aruba pa asina nos acelera e finalisacion di e acuerdo entre Gobierno di Aruba y Valero. Mescos cu nos di MEP a lobby cu PDVSA exitosamente pa habri  e refineria nos a pidi nos Lider lobby cu Valero.

Ta di vital importancia pa nos Digno Pueblo y Pais logra e reapertura di e refineria di Aruba, nos no kier pensa cu e lo por pasa den mente di Valero Energy Corporation tuma un conducta contra productivo. Pesey nos mensahe: NOS TA SPERA VALERO USA BON HUICIO Y DUNA BON COOPERASHON PA YEGA NA E ACUERDO FINAL PA HABRI E REFINERIA CU PDVSA CITGO.

Usando sentido comun nos mester califica como fout cu Gobierno di Aruba no a atende e proceso di reapertura di e refineria di Aruba simultaneamente cu PDVSA CITGO Y CU VALERO, pero awor cu esaki ta e caso nos kier mira e final felis sperando cu e bon cooperacion di tur partido concerni den e negociacionnan.

Valero Energy Corporation y Gabinete Mike Eman 2 kier a desmantela e refineria pero nos Digno Pueblo a desea y dicidi otro, y ta danki na e rosea di nos Digno Pueblo cu awe e refineria di Aruba ta na vispera pa habri bek.

E REAPERTURA DI E REFINERIA DI ARUBA TA PONE ARUBA BEK RIBA PIA. E REAPERTURA DI E REFINERIA TA PONE SAN NICOLAS RIBA PIA. E REAPERTURA DI E REFINERIA TA PONE NOS JUINAN DI TERA Y CONTRATISTANAN LOCAL BEK NA TRABAO. ESAKI TA E CAUSA PA CUAL NOS DI MEP A LUCHA TANTO PA LOGRA E REAPERTURA PA E FELICIDAD GRANDI DI NOS PUEBLO.

Expresionnan haci den e articulo aki no necesariamente ta refleha opinion di ArenaPoliti.co