Parlamentario Chris Romero (MEP): Gobierno di AVP a logra produci unicamente 1.7% di energia alternativo den 7 aña di Gobernacion
![ChrisRomero26](/images/2016-press/ChrisRomero26.jpg)
Un biaha mas nos por a mira sr. Mike Eman y sr. De Meza ta cana bisa cu actualmente Aruba ta riba un consumo di 17% di energia alternativo. Mi tin cu bisa cu finalmente nos por scucha sr. Mike Eman papia algo realistico, aunke e ta keda purba bende nos un 6 pa un 9.
Berdad ta cu den e ultimo 7 aña aki di Gabinetenan Mike Eman I & II, e unico porcentahe di energia alternativo cu nan a logra acumula ta loke cu ta haya for di e solar panels na Aeropuerto Internacional Reina Beatrix, cu ta mas o menos 1.7%.
Lagami splica na un manera mas detaya pakiko mi ta bin cu e ponencia aki.
Ta conoci cu e molinanan di biento na Vaderpiet ta produci aproximadamente 14% di energia alternativo. Pero esaki no ta necesariamente un logro cu por duna sr. Eman y su Gobierno, pasobra e molinanan aki ta existente caba for di e gobernacion anterior bou signatura di MEP.
E sobra porcentahe cu ta sera e 17% cu tanto sr. Eman y sr. De Meza ta gaba, ta loke e particularnan ta aporta cun’e pa medio di nan mesun inversion pa produci energia alternativo, sea na nan cas of negoshi.
Dus si nos sinta analisa bon, sr. Eman ta bolbe pronkia cu pluma cu no ta di dje! E unico logro pa cu energia alternativo cu Gabinetenan Mike Eman I & II tin bou nan nomber ta e solar panels na aeropuerto. E molinanan di biento na Vaderpiet ta un logro di Gobierno di MEP, y e solar panels riba cada cas of negoshi ta un logro priva di cada ken cu a dicidi di inverti den esakinan.
Mi pregunta na Prome Minister di Aruba: Cu ki cara bo ta biahando rond mundo promoviendo energia berde, caminda cu den 7 aña como cabes di Gobierno bo unico logro tabata di produci 1.7% di energia alternativo?
Ta berdad cu Aruba ta produciendo actualmente 17% di energia alternativo, pero loke cu no ta berdad ta cu esaki ta danki na sr. Mike Eman su Gobierno.
Mirando tur e acontecementonan rond di e maneho sostenibel fracasa di AVP su Gobierno, mi ta dirihi otro preguntanan na sr. Eman: Con sigur y realista ta pa bisa cu pa 2020 Aruba lo ta 100% sostenibel?
Si den 7 aña di tempo bo a logra produci unicamente 1.7% di energia alternativo, con bo por sigura cu pa aña 2020 Aruba lo draai 100% riba energia alternativo?
Expresionnan haci den e articulo aki no necesariamente ta refleha opinion di ArenaPoliti.co