Lider di MEP Evelyn Wever-Croes a declara cu enseñansa ta prioridad pa MEP. Y pesey mester percura pa tur mucha tin oportunidad igual na enseñansa.
Un di e formanan pa logra esey ta hasiendo enseñansa liber pa tur mucha. Pasobra enseñansa liber ta permiti tur mucha e mesun oportunidadnan den enseñansa.
Contrario na e filosofia y maneho di partido AVP cu a hasi enseñansa mas caro cu nunca. Schoolgeld y collegegeld a aumenta pa scolnan basico, scolnan secundario y estudionan avansa. Pa bo manda bo yui EPI of Colegio Arubano ta practicamente full un salario di
minimumloon bo mester paga y esey ta hasi cu hopi hoben no ta sigi studia. Esey nos kier evita. Den mi bishitanan den casnan mi ta topa cu hobennan cu tin hopi potencial pa studia, pero cu mester a stop di studia pasobra nan mayornan no por carga tur e gastonan. Pesey ta duel nos cu gobierno di Mike Eman ta hasie cada biaha mas dificil pa nos muchanan studia.

MEP a presenta un mocion den Parlamento dia 1 di april 2015 cu a haya sosten di tur miembro di Parlamento. Den e mocion gobierno a duna minister Hooijboer-Winklaar instruccion pa hasi estudionan necesario pa introdusi enseñansa gratis pa tur mucha. Awor un aña mas leew nos ta ripara cu e minister no a hasi net nada. Peor ainda pasobra e gobierno aki ta hasiendo enseñansa cada biaha mas caro! Pesey nos lo yama e minister bek den Parlamento pa e duna cuenta dicon e no a hasi caso di e mocion di Parlamento, segun e lider di MEP.

"Finalmente mi kier manda un mensahe pa minister Hooijboer: final di bo periodo como minister ta yegando, con bo kier pa pueblo recordabo? Como un minister cu realmente a logra algo pa enseñansa, of como e minister cu a cuminsa un persecusion personal y infantil contra un juffrouw di scol y por lo demas a hasi bunita so?" Lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co