Den un Cas di Partido yen. 

ORANJESTAD - Diadomingo e baranca fuerte di partido AVP mr. dr. Mito Croes, a cambia e mundo aki pa un miho luga. Pa Aruba henter, pa partido AVP y sigur pa su lider Mike Eman, su amigonan Henny Eman, demas amigonan cerca, su famia y tur cu a conoce Mito awor of pa hopi aña e sla ta durisimo. E consehonan di balor inmenso cu Mito tabata duna, su chistenan pa cual e tabata conoci, su inteligencia y vision grandi, ta bay haci falta pa hopi tempo. Mito su presencia den AVP tabata clave y respeta. Dialuna anochi partido AVP a recorda e baluarte aki den forma grandi. Varios orador, amigonan di Mito di hopi aña a conta recuerdonan bunita di Mito. Esaki dilanti un sala yen di hende, cu hopi gratitud y ternura.

Rene Herde, kende conoce Mito pa decadanan a recorda Mito ora cu el a drenta politica den un tempo dificil. "Pero ultimo añanan nos a conoce Mito den un diferente otro funcion. Den e organo mas halto di Reino, Raad van State. Den e funcion ey Mito no a lubida di unda e ta bin. E no a lubida loke ta importante pa nos pais. Ora RvS a saca su conseho pa Parlamento Hulandes riba e conflicto cu tabatin na 2014, por a mira e man di Mito den dje. Esey ta Mito. Semper na vanguardia di su isla stima." Herde a papia tambe di e studielening cu Mito Croes a introduci. Un asunto esencial.

Glenda Margaretha, pa hopi aña a milita den partido AVP, ta corda con tempo el a drenta den politica, un di e prome hendenan cu el a topa ta Mito, kende a haci un chiste cu ne. Asina el a cera conoci cu e humor seco pa cual Mito tabata conoci p'e. Aparte di su chistenan Glenda a recorda Mito tambe como un homber trahado, inteligente y cu un modestia grandi. "Semper cla pa yuda. Un homber cu hopi pasenshi. Un hende sumamente  sabi cu nunca a laga otro sinti nan menos cu ne pa loke ta su inteligencia,", esey tabata Mito Croes.

Henny Eman, ex lider di AVP, e persona cu a trece Mito den partido AVP, a perde su hende di confiansa, su amigo y su compañero di lucha di casi 35 aña. "Nos a perde un hende hopi, hopi grandi," Henny a inicia su bunita discurso. El a sigui conta di e periodo cu Mito a drenta politica activo. "Mito tabata un cientifico, un profesor na Universidad cu tabatin su dilanti un carera di Husticia hopi leu di politica. Un homber calmo, serio cu no a kere ningun rato so cu e lo mester a drenta politica."Henny a bay bek den tempo pa recorda con a tuma nan hopi energia pa convence Mito cu e tin un responsabilidad y un tarea." Henny a splica cu partido AVP a para pa realisacion di Status Aparte meintras cu otro corientenan politico a bay pa Independencia y tabata bringando fuerte pa esey. Un asunto cu hopi por ta a lubida. "Mito a dicidi pa drenta politica pasobra e tabata di acuerdo cu Henny Eman cu e pueblo merece di haya su Status Aparte, sin condicion. E tabata e persona indica cu por a convence e otronan y Hulanda pa Aruba haya su Status Aparte. E oposicion fuerte y agresivo den direccion di partido AVP, tabata haci cu mas fuerte Mito a para den su ponencia. Aruba mester haya su Status Aparte sin independencia. Danki na Mito esaki a keda realisa. "Den e lucha pa Aruba su Status Aparte, Mito Croes tabata di un balor sin igual," Henny a bisa famia y amigonan presente.

Eddy Croes, otro amigo y compañero di partido di Mito, a repasa su amistad y momentonan memorabel cu e tabatin cu Mito Croes. "Mi a conoce Mito Croes mas o menos 40 aña pasa. No den politica. Mito tabata docente na Universidad. Mi a cera conoci cu ne y desde prome dia nos tabatin un bon contacto cu otro. Eddy Croes tambe a bay leu den historia recordando tempo e tabata Minister di Husticia y Mito como Minister Plenipotenciario tabata prepara tur su documento y citanan ora e tabata bay Hulanda. "No solamente prepara nan, pero Mito tabata participa tambe na e encuentronan cu mi tabatin eynan. Na su manera keto, e tabata scucha, pero ora mester e tabata haci su observacionnan cu semper tabata observacionnan di balor." Eddy Croes a menciona tambe cu den añanan 90 Aruba tabatin colga riba su cabez e Independencia cu Hulanda a impone riba Aruba pa por a haya su Status Aparte. Mito, e tempo ey hunto cu otro cañon Tico Croes a traha riba un documento cu nan a yama 'Doño di nos propio destino'. "Aunke cu e titulo tabata na Papiamento, e contenido tabata na Hulandes. Den e documento aki Mito y Tico a splica na placa chikito pakico Reino no por nenga Aruba su Status Aparte cu nos a haya riba papel na 1986 y mara esaki na Independencia na 1996. Nan a saca un di dos documento titula 'Het Statuut, vrijheid en gelijkheid'.  Aki den nan a sigui elabora riba e derecho cu nos tin pa mantene nos Status Aparte sin un independencia. E documentonan aki tabatin influencia grandi den Reino. Minister di e tempo ey Hirsch Ballin na 1992 a bin Aruba y a tene un charla na Universidad y eyden el a referi  na e dos documentonan aki. Hopi hende por ta no sa e historia aki, pero esaki ta parti di e trabounan di Mito." E fecha di Independencia di Aruba na 1996 a wordo kita.

Lider di partido Mike Eman a cera e anochi recordando Mito cu un broche di oro. Den un discurso cu a pone henter e sala keda keto y den forma emocional  el a repasa su tempo cu Mito Croes. "Mesun amigo y aliado cu Mito tabata di Henny y e otronan, e tabata di mi. E tabata e ruman grandi di mi pa kende mi tabatin un gran stimacion. Mito por a wak den mi wowonan ora mi tabatin dianan dificil. E tabata yama mi na mi nomber oficial y tabata bisa mi pa suavisa cos 'Michiel, niet alleen de lusten, ook de lasten.' Tabata su manera pa bisa cu e funcion aki ta bin cu hopi responsabilidad. Un funcion cu enberdad ta trece cu ne momentonan sumamente placentero, di  victoria, di triunfo, di satisfaccion, pero tambe momentonan dificil, di desapunto, di  retonan grandi, momentonan di conflicto, di incertidumbre cu e pregunta grandi 'kico awor'. "Eman a conta cu no tabatin un miho persona cu Mito ora e pregunta ey ta draai den bo cabez henter ora. Durante su discurso lider di partido AVP Mike Eman a bisa cu Mito tabatin e combinacion di inteligencia cu un consenshi asina integro y honesto cu esaki a haci Mito un persona excepcional. "No solamente na Aruba, pero den Reino henter."  A sigui un awacero di aplauso, asina duro cu Mito por a tende te den shelo. Eman a bisa cu e funcion den RvS ta e coronacion y reconocimento di mas grandi cu tin pa un hurista. Asina mes Mito, kende tabata un candidato fuerte pa e posicion aki no a riña pa sali na defensa di MIke Eman kende a bay den un welga di hamber na 2014 ora Hulanda a impedi gouverneur firma e presupuesto di Aruba.  Mito Croes, e experto mas grandi cu tin riba tereno di Statuut, a reta Hulanda cu un posicion fuerte di principio, sin worry cu su candidatura pa drenta RvS por ta na peliger y esey tabata e caso tambe. Ora cu el a bisa cu Plasterk y Hulanda tabata robez, a para su nombracion. "Pero bosnan fuerte di entre otro Hirsch Ballin a sali dilanti y a percura cu e nombracion a tuma lugar toch." Esaki ta tipifica e homber Mito Croes, un personahe grandi. Na final Mike Eman a gradici famia di Mito pa a presta Aruba y partido AVP e homber excepcional aki. "Mito ta e conocedor di mas grandi di Reino Hulandes riba tereno estatal y asuntonan di Reino."

Na final di e bunita anochi tur presente a canta 'Abo so', bou guia di Armando Villasmil riba guitara y cantantenan Benvinda de Sousa, Rene Herde y Yolanda Croes.

Expresionnan haci den e articulo aki no necesariamente ta refleha opinion di ArenaPoliti.co