Brug bieu ta keda existi como parti di un Linear Park di Pos Chikito.  

ORANJESTAD – Pa algun siman caba trabounan di preparacion pa un parti iconico di proyecto di Green Corridor ta tumando luga. Diaranzon mainta tabata asina leu cu e brug nobo cu ta bay conecta pariba y pabou di brug, cu un ‘vierbaansweg’ a cuminsa wordo arma. E ta un parti importante di e infrastructura di ‘Green Aruba’ y uno cu ta rekeri hopi trabou y man experto pa completa. 

Prome Minister Mike Eman y Minister encarga cu infrastructura di pais Aruba tabata na e sitio pa e ocasion special aki. Bou guia di ingenieronan di ‘Caribbean Infrastructure Company’ y Departamento di Obranan Publico (DOW) e ministernan a haya un splicacion amplio di con e proyecto ta hinca den otro, e proceso di arma e brug y con esaki ta bay tuma luga. 

E brug exitente, e brug bieu, cu a haci e trabou di conecta pariba y pabou di brug pa decadanan largo, no ta bay wordo desmantela of kibra. E brug existente ta bay forma parti di e infrastructura pa hende, un Linear Park, cu ta bay haci di e bisindario un luga caminda ciudadanonan por haci uzo di e facilidadnan pa ehercicio, en general movecion saludabel.

E prome parti di e brug cu a keda instala tin un peso di aproximadamente 14 ton y a tuma algun ora pa por a wordo poni na su luga. Na final a invita Prome Minister Mike Eman pa yuda sigura e structura na su luga pa medio di ‘bolts’ gigantesto.

E team amplio cu a completa e prome fase di arma e brug nobo di Pos Chikito tin un trabou grandi nan dilanti, pero ta mustra cu e experticio ta duna pa un proyecto keda completa segun tur exigencia y tambe den e tempo apropia.

Expresionnan haci den e articulo aki no necesariamente ta refleha opinion di ArenaPoliti.co