Dialuna a inicia tratamento di Presupuesto di Pais Aruba. Den un seniorenconvent a palabra hunto cu lidernan di fraccion e procedura di e reunion y presidente di Parlamento a presenta un schedule pa trata tur e presupuestonan. Cada parlamentario ta haya 90 minuut pa nan promer tanda y 45 minuut pa segunda tanda. Griffier ta nota e cantidad di minuut di discursonan. Den pasado parlamentarionan tabata haya te hasta menos minuut. Esta 70 minuut pa primera tanda y 35 minuut pa segunda tanda y hasta a yega di haya 40 minuut pa primera tanda y 20 minuut pa segunda tanda. Dialuna merdia a cuminsa trata e ministerio di finanzas den presencia di minister Bermudez y 12 parlamentario a haci pregunta durante 3 ora y mey riba e promer dia y 2ora y mey e Segundo dia. En total 35 pregunta a ser haci y minister a contesta hopi conciso. A sigui diamars mainta cu segunda tanda y despues di contestanan di minister a sigui cu e ministerio di Justicia den presencia di minister Arthur Dowers. Durante e ultimo luna e minister aki a bin Parlamento varios biaha tambe den reunion publico tocante e asunto di criminalidad. E minister a duna cieto cifra y a elabora ariba e parti preventivo. Aki tabatin mas o menos 30 pregunta di banda di miembronan di Parlamento. Diaranzon a cuminsa cu tratamento di e ministerio di economia, comunicacion, energia y medio ambiente den presencia di minister Mike de Meza. Un total di 11 miembro di Parlamento a hiba palabra y a haci en total 40 pregunta y Minister de Meza a tuma su tempo pa contesta dicho preguntanan pa despues a incia cu tratamento di e di cuatro presupuesto di Infrastructuur y Integracion di minister Benny Sevinger.

Expresionnan haci den e articulo aki no necesariamente ta refleha opinion di ArenaPoliti.co