Porfin e wowonan a cuminsa habri!   

Desde cu Jeffrey Kelly di cabey boto a drenta Parlamento di Aruba ta solamente mentira y manipulacion e ta keda plama den pueblo y tur esaki den su actonan di desesperacion mirando loke ta bay ta e destino fatal di su partido AVP na September proximo. Den un comunicado emiti e siman aki, sr. Kelly a alaba su gobierno di tur forma pa tur loke nan a haci relaciona cu e infrastructura di nos scolnan. Den un forma cla y raspa Jeffrey Kelly a admiti publicamente cu su gobierno di AVP no a construi ni sikiera un scol durante e ultimo 8 añanan. Den su comunicado Jeffrey a papia solamente di “reconstruccion y renobacion di scolnan”, “scolnan cu a haya cura”, “scolnan cu a haya un man di verf” durante e ultimo 8 añanan, y net nada di construccion.

Ningun otro construccion
Pero esey tabata semper e modus operandi di Gabinete Eman, ya cu no ta scolnan so nan no a construi, pero nan no a construi ningun cas social, ningun facilidad deportivo nobo, ningun warda di polis nobo, ningun cas pa anciano nobo etc, siendo cu nan gobierno a haya 2.7 biyon florin extra na entrada durante e ultimo 8 añanan y cual suma nan a derocha na nan antoho.
Pero e mentira di mas grandi cu e politico mediocre aki a ventila ta ora cu e ta declara cu “durante e 8 aña di gobernacion di MEP realmente nada a wordo haci na scolnan”. Aki por mira claramente cu Jeffrey a pega cu e mesun malesa di su lider Mike Eman: Gaña y sigui gaña!
Ta p’esey MEP pa di tantisimo biaha kier hinca den e cabes duro di Jeffrey Kelly e siguiente proyectonan di scolnan construi y renoba durante e 8 añanan di Gabinete Oduber:

Construccion y renobacion di scolnan
1. Construccion di school EPI na Sero Blanco, 2. Construccion di scol basico na Sabana Basora, 3. Construccion di 11 klas extra pa Maria College, 4. Construccion di Scol Primario Conrado Coronel na Morgenster, 5. Construccion di Scol Basico Conrado Coronel na Morgenster, 6. Construccion di school basico na Kudawecha, 7. Renobacion y ampliacion di Colegio Laura Wernet Paskel, 8. Renobacion y ampliacion di Colegio Sagrado Curason, 9. Renobacion di Sint Aloysiusschool, 10. Renobacion di Commandeur Pieter Boerschool, 11. Renobacion di Colegio Hilario Angela, 12. Renobacion di Maria Regina school, 13. Renobacion di Paulusschool, 14. Renobacion di Graf von Zinzendorfschool, 15. Renobacion di ex-Mater Dei school, 16. Renobacion di Maria College y 17. Renobacion di Rosario College. Pues aki por mira 6 construccion y 11 renobacion di scolnan rond Aruba. Cu esaki tambe Jeffrey Kelly den bista di pueblo ta pasa pa un mentiroso patologico cu no a mira ningun di e obranan aki ehecuta durante e 8 aña di Gabinete Oduber.

Finalmente lo ta bon pa Jeffrey Kelly na lugar di skirbi disparate y mentira tur ora, bay puntra su lider Mike Eman dicon te ainda nan tin e scol HAVO/VWO na Noord boicotia desde 2009, tempo cu Gabinete Oduber a laga e proyecto aki completamente cla atras pa ehecuta.
Berguensa pa Jeffrey Kelly, un supuesto Nortero cu no tin e curashi pa sali na defensa di su propio districto, pero ta prefera di keda na bon cu e destructornan di nos pais y p’asina cu su 90 voto e por haya un cabey boto atrobe riba lista di AVP.

Expresionnan haci den e articulo aki no necesariamente ta refleha opinion di ArenaPoliti.co