Historia estatal no por wordo troci ni falsifica!     

Diadomingo 12 maart  ta exactamente 34 aña pasa cu durante e Conferencia di Mesa Rondo (RTC) na Hulanda – bao guia di nos Libertador Betico Croes - a logra corona cu exito e lucha di nos pueblo pa su Status Aparte. Esaki despues cu nos Libertador a guia e comision pa prepara nos structura estatal den Parlamento, unda tur partido politico y gremio den nos comunidad tabatin e oportunidad pa dialoga riba e futuro estatal di nos isla.
Aruba a inicia e proceso na un manera acelera desde 9 di februari 1971, fecha cu a funda e partido Movimiento Electoral di Pueblo (M.E.P.), cu e meta primordial pa realisa e anhelo di nos pueblo.
Den Eilandsraad di Aruba e comision pa prepara nos structura estatal (R.C.O.A.) a acepta dia 24 januari  y 24 di februari 1983, mocionnan pa manda un delegacion, cu e instruccionnan necesario y cu un gran cantidad di condicion pa bay negocia na e Conferencia di Mesa Rondo na Den Haag, Hulanda, di dia 7 pa 12 di maart 1983. Nos pais tabata representa pa tur e partidonan politico, gremionan comercial, sindical y clero. E union bao di e delegacion tabata hopi grandi.

Logronan di RTC-1983 
Locual nos a logra exactamente 34 aña pasa ta encera entre otro lo siguiente:
1. Saliendo for di e derecho di autodeterminacion di cada un di e islanan, e conferencia ta acepta e resolucion di Aruba pa haci uzo awor di su derecho di autodeterminacion, door di scoge definitivamente pa independencia, cu mester wordo realisa na aña 1996. E fecha aki lo wordo poni den Statuut. Hulanda lo duna su aporte pa Aruba haña reconocimiento di derecho internacional. Alavez cu prome cu 1996 lo wordo teni un conferencia di evaluacion entre Reino y Aruba, pa eventualmente examina e fecha di independencia di Aruba, den luz di evolucionnan estatal entre e paisnan di Reino;
2. E conferencia ta bay di acuerdo cu Aruba como fase transitorio prome cu independencia ta haya un periodo di 10 aña. Mientrastanto Aruba lo haya un Status Aparte cual ta posicion como pais autonomo den Reino Hulandes a base di Statuut. E status aki lo principia dia 1 di januari 1986.
Tabatin den total 33 punto di conclusion di cual esakinan ta un par cu ta di vital importancia.
E conferencia di Mesa Rondo a resulta sumamente exitoso pa Aruba y durante e conferencia aki nos Libertador Betico Croes a defende cu curashi y determinacion e causa di e pueblo Arubano. Locual ta keda como un expresion historico na final di e conferencia tabata e palabranan “De kogel is door de kerk”, expresa pa ex-Premier di Hulanda Ruud Lubbers. Hecho ta cu e Status Aparte a ser logra despues di apenas 12 aña di lucha real, esta di 1971 pa 1983!

Scrapmento di fecha di Independencia 
Y tabata sr. Nelson Oduber – cumpliendo cu e acuerdo di RTC pa reevalua e fecha di Independencia prome cu 1996 – a regresa Hulanda y a logra dia 13 di juli 1990 un convenio cu Ministro Presidente sr. Ruud Lubbers y sr. Ernst Hirsch Ballin, pa saca e fecha di independencia di 1996 for di den e Statuut. Pa promer vez den historia di Reino, a laga pone den Statuut cu Aruba tin e derecho di autodeterminacion, pa dia cu nos pueblo ta desea esaki e por determina su propio destino. Pa nos por bira independiente, nos mester organisa un referendum, haya e mayoria na fabor di esaki y sosten di 2/3 parti di miembronan di Parlamento. Di e forma aki, nos a salvaguardia e derecho sagrado di nos pueblo, pa un dia nos por bira independiente. Esaki ta algo noble y sagrado di cada pueblo cu ta respeta su mes.
Siguramente cu nos di MEP ta sumamente orguyoso di nos lider inmortal Betico Croes, nos lider honorario sr. Nelson Oduber y hopi otronan cu a contribui pa awe nos ta un pais autonomo den Reino Hulandes.
Pabien pueblo y ban sigui defende e identidad Arubiano y conserva e balornan spiritual di un isla chikito di tamaño, pero noble y grandi di curason, digno di ta un pais soberano den Reino Hulandes. 

Expresionnan haci den e articulo aki no necesariamente ta refleha opinion di ArenaPoliti.co