ORANJESTAD - Mesora despues cu duaneronan a tuma accion na Aeropuerto Reina Beatrix pa manifesta nan preocupacionnan pa cu siguridad, Minister Interino di Finanza y Organisacion Gubernamental, Richard Arends a reuni y mantene comunicacion cu representantenan di sindicato SADA, como tambe e director di Departamento di Aduana. 

Segun e mandatario, despues di 3 dia di reunion conhuntamente cu Minister Dowers, Minister De Meza y diferente sindicatonan manera SADA, TOPA, SEcPPA, STA a logra yega na un acuerdo pa garantisa mas siguridad pa e duaneronan.

“Como Gobierno y tambe Ministerio di Finanza, cu sigur ta para pa garantisa siguridad pa tur empleado di e diferente departamentonan, nos a logra garantisa 20 espacio di parkeo bou di afdak cu lo wordo uza exclusivamente den orario di trabou,” asina Minister Arends a indica.

Minister Arends a sigui splica cu tabata tin algun luga reserva caba pa e duaneronan den e parkeo di aeropuerto, pero awo ta cuestion pa expande e cantidad aki pa 20 espacio. “E parkeo aki ta di AAA, pues nos como Gobierno ta paga pa e luganan aki cu nos kier haci disponibel pa nos departamentonan y nos a haya hopi bon cooperacion di sr. Fazio di AAA pa logra esaki,” e mandatario a bisa.

Tanto Gobierno como Ministerio di Finanza tin comprension pa e situacion ya cu en berdad e luga di parkeo cu e duaneronan ta uza ta mas leu y tin poco iluminacion. Durante transcurso di dia e director Croes di Departamento di Aduana a reuni cu representantenan y director di AAA pa yega na un solucion mas lihe cu ta posibel.

E mandatario a duna di conoce cu, despues di ambos ‘walk out’, tur cos a bolbe na normalidad y ningun vuelo a wordo afecta.

Expresionnan haci den e articulo aki no necesariamente ta refleha opinion di ArenaPoliti.co