Aruba e isla mas chikito tabata forma parti di e constelashon di Antia Hulandes ta e prome isla cu a proclama su mes un bandera nacional. Desde 1976 e colornan di e bandera tabata legalmente bon fiha y defini. E bandera ta kolo blou kla cu dos strepi geel y un strea cora cu rand blanco. Decreto di e bandera di Aruba a wordo fiha 16 maart 1976 y dos dia despues e bandera a wordo hisa pa prome bes den Wilhemina Stadion.

E color blou di e bandera ta simbolisa e lamar inmenso cu ta rondona nos dushi isla. E strea  di cuater punta ta simbolisa e cuater direccion di e compas. E posicion di e strea riba e bandera ta e posicion di honor esta mas serca di e asta. E strea color cora cu su rand blanco ta simbolisa e cora cu ta pa rindi homenaje na e sanger indian cu a drama den rooi Frances pa nan libertad y e blanco ta representa e santo blanco sin mancha cu ta rondonan nos isla. E dos strepi geel ta e color di abundancia cu ta ilustra nos industria petrolera y e aloe cu semper ta bibo. E posicion horizontal di e strepinan geel ta demostra e solidez y largo duracion di ta e abundancia. Aruba tabata un isla cu tabatin oro cual tambe tabata un fuente di ingreso di antes. Ademas Aruba conoce un naturalesa asina bunita cu palo y matanan cu ta florece den e color geel, por menciona kibrahacha, mata di brazil, e flor di aloe, wanglo, bonchi strena y curahao.

Mi ta trece un poco di e historia di nos bandera pa recorda e motibonan pakiko a kies e colornan y a hasi e diseño di un bandera cu nos mester ta hopi orguyoso di dje. Un bandera cu ta demostra cu nos tabatin arubanonan cu un sintimento grandi pa cu nan pais y cu awe ainda nos tin e arubanonan orguyoso cu ta naci na Aruba y tin tur capacidad pa hasi diferencia den e mundo.

Mi kier felicita tur cu ta biba riba nos dushi baranca cu ta sinti nan parti di dje, arubanonan cu ta biba den exterior cu tin nos dushi Aruba den mente y corazon, y na tur arubanonan cu di un forma of otro forma a aporta na hiba nomber di nos pais na halto den exterior. Ban sigi traha y lucha pa nos pais por keda un pais liber unda nos por ta orguyoso di forma parti di dje. Mi ta stima mi pais y ami ta orguyoso di ta un arubano. Pabien Aruba.

Expresionnan haci den e articulo aki no necesariamente ta refleha opinion di ArenaPoliti.co