ORANJESTAD - Diaranson mainta Minister di Finanzas, Angel Bermudez a ricibi Sr. mr. Frederick Nieuwboer, Sr. Ling Wong y Sr. Roland de Cuba di Contraloria General di Aruba pa asina haci entrega oficial di e cuenta anual di pais Aruba pa aña 2014 y inicia e parti final di henter e proceso presupuestal.

Segun e mandatario di finanzas, e ta consciente cu e rapport aki ta atrasa sin embargo e no tin duda cu e trabou diligente di Contraloria General esaki lo wordo entrega na su debido tempo. “Nos ta un par di siman laat si nos compar’e cu e fecha stipula den e ley di contabilidad pero Contraloria General a laga sa tambe cu nan ta hopi sigur cu nan lo por bin cla cu e trabou cu nan tin cu haci di investiga e cifranan aki y entrega e rapport prome cu 1 di September”, Bermudez a bisa.

Den e proximo simannan lo analisa e con e ehecucion di e presupuesto di 2014 tabata ta, con e placanan a wordo cobra y gasta, ademas lo investiga tambe si cifranan aki berdaderamente ta legal, formal y cu nan ta cuadra den e cuadro di legalidad di e presupuesto aproba.

Presidente di Contraloria General tambe a expresa durante e reunion cu Minister Bermudez cu nan tin tur confiansa cu nan lo investiga y entrega e rapport corespondiente den e siman di 28 di Augustus.

Mientras tanto, Parlamento di Aruba lo ta drenta den receso pronto sin embargo e mandatario a indica cu esaki conhuntamente cu tur e concepto di ley cu tin pendiente ainda lo no afecta e finalisacion di e fase presupuestal aki. “En berdad tin algun concepto di ley cu ta pendiente y cu tin un caracter di urgencia paso e tin un fecha mara na dje, manera e aumento di porcentahe di BAZV y e reduccion di e prima di AZV cu mester drenta na vigor 1 Juli, sin embargo e cuenta anual aki no tin e caracter di urgencia pa wordo trata aworaki den Staten pero si e lo por tuma luga den e prome siman di September asina cu Contraloria General entrega esaki na Parlamento”. 

Expresionnan haci den e articulo aki no necesariamente ta refleha opinion di ArenaPoliti.co