Gabinete ME II: Cuerpo di Aduana a instala ‘management team’
Minister Bermudez ta hopi satisfecho cu e ultimo desaroyonan
ORANJESTAD -Despues finalmente Cuerpo di Aduana a logra muda pa un edificio temporal nobo, Cuerpo di Duana a ricibi bishita di Minister Bermudez na e oficina central aki situa awor na “Budlex Building” pa asina conoce e edificio, comparti un rato cu demas colega y tambe conoce e ekipo di maneho cu a wordo instala pa asisti director di Aduana, esta Sr. mr. Roderick “Ricky” Croes den su maneho.
Segun e Director Croes tur cambio ta tuma su tempo pa adapta na dje sin embargo den e caso di Cuerpo di Aduana e mudansa pa e edificio nobo a trece hopi union den e cuerpo como tambe hopi motivacion pa cu e trabou. “Tur colega ta entusiasma y nan a cuminsa mira e desaroyonan cu ta tumando luga pa mehora y motiva nos den nos trabou”, asina Sr. Croes a remarca.
Cu e mudansa aki tambe a instala un ekipo di maneho cu ta duna sosten na e director y cu ta facilita e proceso di cambio y actualisacionnan cu mester tuma luga ainda den henter e organisacion duanero. Na mes momento tambe e mandatario di finanzas a comparti tur e ultimo desaroyonan pa loke ta trata e departamento riba su mes como tambe e plannan pa futuro.
Minister Bermudez a manifesta su desapunte pa cu e negligencia di e departamento aki den e ultimo añanan principalmente tumando na cuenta e importancia di Cuerpo di Aduana como un di e 2 cilindernan cu ta genera entrada pa Gobierno.
Sin embargo e mandatario a sigura cu departamento di Aduana tin su debido atencion y cu e iniciacion di e ‘management team’ lo facilita e mehoracion y progreso di e trabounan diario como tambe a comunicacion necesario pa realisa e actualisacion y modernisacion cu e departamento tin mester.
“Recientemente e departamento a haya dos cacho nobo, como tambe 5 auto pa diferente sector di e departamento y siman pasa durante mi biahe pa Hulanda mi a apela na mi ex-coleganan di Aduana pa nan sosten y ayudo cu algun curso y training nos tin mester na Aruba, pues poco poco tur cos a cuminsa cana y asina nos lo continua pa sigui mehora e departamento aki”, asina e dignatario a splica durante e reunion cu e ekipo di maneho.
Finalmente Minister Bermudez a desea tur miembro di e ekipo di maneho tur clase di exito cu e tareanan y na mes momento sigura tambe cu e reunionnan semanal cu Director Croes lo continua pa asina nan tambe trece pa dilanti tur punto cu mester di su debido atencion.
Expresionnan haci den e articulo aki no necesariamente ta refleha opinion di ArenaPoliti.co