KEN DI AVP A COBRA GASTO DI ABOGADO DI 15 MIYON FLORIN?

ORANJESTAD – Lider di MEP Evelyn Wever-Croes durante reunionnan di parlamento a mustra na forma hopi cla, cu e abusonan contra famianan di politiconan den Parlamento mester caba.

Den  prome tanda di e reunion ami no a toca famia di NINGUN politico, y den pasado tampoco pasobra esey no ta mi estilo. Pero di parti di AVP si mayoria di e politiconan a haya ta bon pa ataca y lastra mi famia constantemente. Ta importante pa tur politico di AVP sa cu apesar cu e no ta mi estilo, si ta di famia boso kier papia, ban papia di famia. E prome cu a cuminsa ataca mi famia tabata net minister Michelle Hooijboer-Winklaar. Net e no kier pa hende papia di su famia, pero e mes ta cuminsa ataca mi famia. Pesey ma puntre, si bo kier papia di famia, ban papia di bo casa, y su compania y tur e dealnan grandi cu el’a fix den seguro pa gobierno. Pero no den gobierno so, pasobra sr. Hooijboer ta un comisario den hospital di Aruba tambe. Corda kiko hues a bisa den e veredicto dia 6 mei 2015: cu e minister a actua incorecto door di otorga e seguro di studiantenan na Hulanda na e compania cu tin Amistad cu su casa! Un hues imparcial a bisa esey. Y e minister a perde e caso ey, y nunca a apela. Kiermeen cu e minister a realisa cu e tabata fout. Stranjo cu e minister awor kier bin ataca famia di hende. Ora bo pidi bo ta haya. Atrobe, no ta mi estilo, pero mi tambe ta cansa di tanto abuso.

BUFETE DI ABOGADO

Minister Dowers a bin lastra mi tata de Parlamento un biaha mas tocante BUFETE DI ABOGADO, wel ban papia di bufete di abogado. E anja aki tin 15 miyon florin den presupuesto pa paga abogadonan amigo di e gobierno aki, un suma astronomico nunca antes bisto. Wel, si bo kier papia di abogado, bisa nos cuanto nos pueblo ta paga senjora di minister Dowers cu tin un bufete di abogado pa trabounan cu e ta hasi pa gobierno? Cuanto nos pueblo ta paga e consehero principal di AVP sr. Sjiem Fat su bufete pa tur e trabounan cu e ta hasi pa gobierno? Cuanto nos pueblo ta pagando casa di parlamentarionan di AVP de Sousa y Peterson pa trabounan cu nan ta hasi pa gobierno? Pasobra mi informacion ta cu di e total di 15 miyon florin e gran mayoria ta na boso esposanan, y y na bufete di abogado Sjiem Fat. Minister Dowers a admiti cu su senjora ta traha pa gobierno, pero no ta gana hopi placa. Nos informacion ta contrario. Entre casa di minister Dowers, casa di lider di fraccion di AVP Baba Herde, casa di Desiree Croes y nan consehero politico principal sr. Hans Sjiem Fat, nan ta cobra gran parti di e 15 miyon florin ey. E minister no a contradesi.

DESIREE CROES

E unico cu a contradesi, ta Desiree Croes, cu a bisa cu su casa no ta gana placa di gobierno, pero esey ta un mentira flagrante, pasobra net su casa no solamente ta traha como abogado pa cual tin suficiente prueba, y consehero pa gabinete Mike Eman, sino tin puesto importante den Lotto atraves di cual el’a gana hopi placa tambe.

FAMIA DI EVELYN WEVER-CROES

Lider di MEP a duna di conose cu no ta su estilo pa hiba atakenan politico di e forma aki, cu den principio e mes ta desaproba. Sinembargo ta basta cu tanto abuso. Acaso nan si por ataca, y ami mester keda keto? Ki ehempel esey ta duna pueblo? Cu nos mester wanta abuso? No! Pesey ma dicidi pa e strategia aki, pa asina duna e senjal bon fuerte cu tipo di abusonan aki mester caba. Y mi ta spera cu e ministernan no hinca den nan cabes pa lastra mi famia NUNCA mas.

Expresionnan haci den e articulo aki no necesariamente ta refleha opinion di ArenaPoliti.co