Durante di henter e tratamento di e presupuesto 2016, e partidonan di MEP y PDR a scohe a nenga deliberadamente e realidad di financiero di Aruba awor aki. Algun aña pasa ta di esey so nan kier a papia didje. Nan no kier a wak e echo por ehempel di e violacion flagrante y arogante di e metemento di Hulanda den asuntonan cu segun Statuto di Reino ta asunto di Aruba. Cu tur e conocemento huridico den e dos fraccionnan aki, nan a nenga di para defende Aruba cu ley den man. Nan a scohe pa nenga di wak e violacion di Statuto, e ley mas halto di Reino y kier a wak solamente cu segun Hulanda e finansa tabata malo. Ora a resulta segun tur organo di conseho di paisnan di Reino, cu Hulanda a viola ley den forma flagrante, nan a keda keto cu tur nan conocemento legal. Nan kier a wak solamente e problemanan financiero. Nan tabata gosa y cita raportnan di Raad van Advies y CFT manera ta storia di cowboy. E aña aki tabata tin un silencio doloroso di parti di MEP y PDR riba finansa di Aruba. Pasobra e raportnan di e dos instancianan NO a duna nan cos pa papia didje. Esnan cu a mustra riba e raportnan aki a haci'e incompleto. Esta un forma di nenga realidad of di usa informacion selectivamente of ora ta cumbini bo so.

CIFRANAN REAL
E cifranan real di aña 2014, 2015 y pronostico pa 2016, tur ta mustra cu loke a prognostica na entrada y reduccion di deficit tabata corecto. Mientras cu PDR y MEP ta sigui grita cu e presupuestonan ta irealistico, e realidad ta cu den 2014 y 2015 a surpasa e entrada cu a anticipa. Na 2014 cu 8.7 miyon. Na 2015 cu 28 miyon. Kier men cu na entradanan e calculacionnan tabata hopi realistico te surpasa esakinan. E gastonan a baha tambe. Esey a conduci na e bahamento di e deficit enormemente di 9.4 pa 3.7 den un aña. Otro aña e ta bay pa 2%. Den e presupuesto 2016 a corta gasto te na un suma di alrededor di 100 miyon compara cu 2015. Cu e entradanan mas halto di tres aña sigui y cu reduccion di gastonan asina grandi den asina poco tempo, no tin niun motibo pa duda den e grado di realidad di e presupuesto. Esaki ta e splicacion basa riba cifranan real cu MEP y PDR no kier accepta.

REFINERIA
Contrario na loke PDR ta bisa, e presupuesto NO a tene cuenta cu e reapertura di e refineria. Gobierno a scohe pa warda pa e habri pa despues adapta e presupuesto 2016 cu lo inclui entradanan nobo door di e refineria. Rene Herde': "Di niun forma a tene cuenta cu entradanan di e refineria. Esun cu bisa cu a traha e presupuesto basa riba un refineria cu no a ni habri, djis no a lesa e presupuesto of deliberadamente ta malinforma pueblo." Si inclui cifranan di un posible refineria habri, e entradanan ta ainda mas halto y e deficit sigur lo yega e 2% of mas abou den 2016. E realidad aki MEP y PDR ta nenga di papia didje y ta scohe deliberadamente pa troce e situacion real. Anto esey sin conta tur otro adelanto na riba tur otro tereno na Aruba den e 6 añanan cu a pasa! Esaki ta e realidad tristo di e politica oportunista di MEP y PDR.

Expresionnan haci den e articulo aki no necesariamente ta refleha opinion di ArenaPoliti.co