Despues cu e mes a bai den prensa y expresa cierto detayesnan awo ta cambia su opinion den un conseho sin specificacion Constitucional. 

RvA y ARK ta e dos instancianan cu a conseha Gobernador pa manda e proposicion di Ley di Presupuesto bek pa Minister di Finansas pa corecionan y aclareacionan promer cu e la keda atendi den Staten. Envez cu Minister di Finansas a sigi algun conseho e tempo ey, e la scohe pa bai den prensa hunto cu Promer Minister y hasi declaracionan contra e decision di Gobernador, RvA y ARK. Despues di esaki e Minister a core bai Parlamento den oranan di anochi y entrega Presidente di Parlamento e proposicion di Ley pa e por keda trata. A palabra cu lo jama un reunion den menos di 48 ora y asina a bulldoze tur posibilidad pa mas tardansa den e Ley di Presupuesto 2014. Na un manera no mucho Constitucional e Presidente di Staten a permiti e Poder Ehecutivo delinia y impone riba e Poder Legislativo cual ta un peliger pa e asina jama Trias Politica cu ta e garantia pa un democracia sano. Den e reunion di Parlamento e Promer Minister a instrui e Presidente di Parlamento pa “bypass” e parti di unda cu lo mester a trata e consehonan di RvA/ARK y pasa pa aprobacion di e Ley di Presupuesto 2014. Esaki a tuma lugar tambe pero na momento cu e Ley aki a jega Gobernador e la dicidi cu no ta firma e Ley pa ehecucion y asina henter e episodio di Aanwijzing, CFT y KB a cuminsa. Cu otro palabra esnan cu a orchestra e scenario aki ta e propio RvA cu awe kier tira e bala leu for di dilanti nan gol. Pa stranjo cu e por pasa, tawata e propio sr. Fritsz Goedgedrag cu a hasi expresionan den medianan local manera eo: “Mester stop di pone consehonan di RvA den lachi”, tambe por corda e expresion “Si nos no hasi nos trabaonan como debe ser na cas, Hulanda lo bin hasie pa nos”. Esaki a pone cu presidente di fraccion di AVP esta sr. Rene Herde a habri afo contra e miembro di RvA bagatelisando su declaracionan y for di e tempo ey no a tende nada mas di RvA/ARK.

E pagina inicial di e KB ta papia pa su mes, si laga afo e contenido di e KB cual semper Gobierno di Aruba tawata tin e oportunidad pa acudi na un Juez pa asina mira su valides Constitucional. Gobierno di Aruba no a hasi uso di e derecho aki pero a opta pa bai den confrontacion di palabra y accionan contra e decision di Su Mahestad Rey Willem Alexander y Gobierno Hulandes cu ta esnan cu ta keda responsabel pa e KB. RvA ta suppose di ta un organo imparcial cu ta emiti consehonan tanto na Gobernador y tambe Parlamento di Aruba riba proposicionan di Ley cu mester keda atendi den Staten. Pa e ultimo 5 anjanan poco tawata e biaha cu a usa of atende cu e consehonan di RvA y tawata cu razon cu sr. Fritsz Goedgedrag di RvA a hasi e declaracion pa stop di laga e consehonan di RvA den lachi. Awor RvA ta emiti un conseho, no un decision mucho menos un instrucion referente e legalidad of procedura di e KB. Pa cuminsa e KB ta un decreto cu no mester di aprobacion di Staten pero mas bien ta un asunto cu ta regarda Gobierno Hulandes. Den e KB tin condicionan y instrucionan cu mester a keda atendi manera e procedimiento di e investigacion di CFT mas tambe e motibonan y condicionan di ki ora Gobernador lo por firma e Presupuesto pa ehecucion. E KB corectamente ta keda publica den Staatscorant mas tambe a keda atendi den otro nivelnan na  Hulanda pa mira su legalidad y tambe justificacion. E rapport/conseho di RvA ta laat, super laat y hasta considera como uno nulo y cu ta e propio RvA ta e asina jama autor intelectual di henter e proceso aki. Si na dado momento RvA por a mira algo cu no ta klop anto tawata su responsabilidad di a atende cu e asunto aki cu mas discrecion manera cu a publica e ehecucion di e KB den Staatscorant. Esaki sigur lo a duna Gobernador y Staten e espacio di atende cu Hulanda promer cu e ehecucion di eo e investigacionan di CFT. Awor cu a bin sali na cla segun e contenido di e CFT rapport kico ta e status real di e Aruba su situacion financiero, awo numa RvA ta core bin papia di supuesto fayonan y of illegalidadnan den e KB. Mas cu claro por a spera esaki tambe y cu ta e propio RvA a laga 5 anja pasa sin nunca a denuncia Staten of Gobierno pa e forma con nan tawata hasi y deshasi cu consehonan di RvA. Awor cu esaki tambe ta aparece den e CFT rapport mas cu claro ta keda na RvA pa saca curpa door di insinua cu tin algo cu no ta klop den e proceso di e KB den e KB mes. RvA a drumi 5 anja largo y a pasa 4 anja presupuestal unda cu Staten y Gobierno a hasi y deshasi cu tur loke tawata na nan antoho. Reunionan di Staten a baha na nivel 0 unda cu e fraccion di AVP no ta respeta puntonan di agenda pero ta consentra mas na ofende y ataca oponentenan den forma baho y vil. Ta orchestra un sin fin di intimidacionan y menasanan den direcion di oponentenan door di jena tribunanan di Parlamento cu coordinadornan y bodyguardsnan y esaki nunca a capta atencion di RvA y ARK. Ta net pa e motibonan cu oposicion tawata trece consehonan y rapportnan di instancianan manera RvA mayoria di reunion tawata mond uit den desorden den e ultimo anjanan. Nunca fraccion di AVP a duna espacio na consehonan di RvA den reunionan di Presupuesto y den e ultimo reunion a hasta MinPres a instrui e Presidente di Parlamento pa by pass e agenda punt cu lo a trata e consehonan di RvA. Dus awe no tin pakico sinta kere of pone atencion na e contenido di e consehonan di RvA referente e KB ya cu pa cuminsa RvA ta un organo di conseho y no ta tuma e decisionan final. Asina ta tambe ta reta Gobierno di Aruba cu e conseho di RvA aki bai Corte y laga un Juez toest si e KB a justifica segun e acuerdonan cu Aruba tin cu Hulanda constitucionalmente y no sinta bruha tera y brinda mas espacio pa despista atencion di e situacion financiero dificil cu Aruba ta pasando aden. 

Expresionnan haci den e articulo aki no necesariamente ta refleha opinion di ArenaPoliti.co