ORANJESTAD – Minister di Asuntonan Economico, Comunicacion, Energia y Medio Ambiente, ing. Mike de Meza a duna di conoce diaranson ultimo cu entre varios colega di Gabinete Mike Eman II ta evaluando posibilidad di crea un plataforma caminda hobennan di scolnan secundario tecnico, manera EPB y EPI, por sigui estudio cu ta prepara nan pa un trabou den refineria. El a menciona esaki pafo di ex-DOOV na San Nicolas caminda tambe tin planea di facilita un espacio pa capacitacion di trahadonan cu ta wordo tuma awor aki pa e CITGO, pero cu tambe por wordo uza dor di, por ehempel, Enseñansa pa Empleo duna cursonan di computer pariba di brug.

Minister ing. de Meza a splica cu den e edificio ubica na e parti mas central di caya grandi na San Nicolas, tin un sala sumamente grandi. Ministernan di Labor, drs. Paul Croes; di Enseñansa, Sra. Hooyboer-Winklaar; di Asunto General, mr. Mike Eman y su persona, ta trahando riba un concepto pa cual a forma un comision. E comision aki tin como tarea pa desaroya un sistema di certificacion pa muchanan cu kier bay den e industria petrolero/tecnico. A duna e comision en cuestion dos luna pa keda cla y presenta un sistema cu por bay implementa den scolnan secundario, manera ariba menciona.

Algun dia atras, Minister ing. de Meza a informa cu durante e investigacionnan haci di e forsa laboral local cu por bay traha bek den refineria, a tuma nota di e factor di ‘vergrijzing’. Tin hopi ex-trahador di Coastal y Valero cu ya a yega nan edad di pension y pesey ta necesario pa entrena y capacita un grupo di trahadornan nobo y hoben.

“Los di esey, tin e parti di certificacion cu mester tuma luga awo pa e rehabilitacion y operacion di refineria,” asina Minister de Meza a splica. “For di aki por duna tur e cursonan ey. Refineria di Aruba y CITGO lo ta hopi activo den e tereno di educacion y tur esey por tuma luga akinan mes.” A duna di conoce tambe cu tin otro sala caminda por duna curso di tur loke ta encera entrenamento di computer. Kier saca mas tanto probecho di e edificio na bienestar di comunidad y trece mas actividad comercial y bida social den centro di San Nicolas.

Ademas di e salanan di entrenamento y capacitacion aki, ex-edificio di DOOV na San Nicolas ta bay bira, den apenas algun siman, e sede di CITGO Desk hunto cu representantenan di DPL y DIMAS; pisonan mas ariba ta bay wordo ocupa dor di Ministerio di Asuntonan Economico, Comunicacion, Energia y Medio Ambiente, y tambe Refineria di Aruba y e compania di Benta, Mercadeo y Distribucion Nacional.

Expresionnan haci den e articulo aki no necesariamente ta refleha opinion di ArenaPoliti.co