MINISTER OTMAR ODUBER A CONTESTA 25% SO DI PREGUNTANAN TOCANTE "ALL INCLUSIVE" 

ORANJESTAD - Parlamento ta preparando pa trata e ley di All Inclusive. Parlamentarionan a hasi nan preguntanan siman pasa y e siman aki e contestanan a drenta. Pero di e preguntanan di Fraccion di MEP apenas 25% so e minister a contesta. Ta parse manera cu e minister tin miedo di duna transparencia y esey ta di lamenta.

Pa loke ta e ley mes, tin consensus cu mester regula esaki pa evita cu tur kamber di hotel bira All Inclusive pero tin consensus tambe cu e ley manera nos tin awor nos dilanti, lo NO logra esey.

Aruba tin un formula exitoso den turismo y den e formula ey tin un parti All Inclusive. Si turistanan na tur parti di mundo kier mas All Inclusive, e hotelnan mester por cumpli cu e demanda.

E mihor pa tur esnan envolvi na e momento aki ta pa duna tempo, siquiera algun luna, pa hasi un estudio professional pa sirbi como dato concreto y pa por tuma decision. Awor nos no tin estudio y nos no por guia nos pais a base di percepcion.

Un otro punto di preocupacion ta e "free enterprise" na Aruba. Den nos sistema gobierno no por dicta con, cuanto y na kiko inversionista kier hasi su inversion. Si nos mira paisnam bisinja nos por mira kiko ta pasa ora gobierno kier tin tur cos den man. Y ta parse cu minister Otmar Oduber kier dicta na Aruba tambe ariba tur cos. mayan gobierno ta capas di bai mete tambe ki color abo por verf bo cas!

E preocupacion di mas grandi ta e falta di transparencia. Dicon no ta facilita tur gremio e rapport di PWC di 2015? E rapport aki a wordo referi na dje, pero e minister NO kier suministra Parlamento ni gremionan un copia! Acaso e rapport aki ta asina negativo pa Gobierno?

Fraccion di MEP ta sostene e esfuersonan pa un "cooling off period". E hotelnan a duna garantia caba cu nan lo no bende den e periodo aki, algo sigur di aprecia. Hoteleronan cu amplio experiencia manera sr Harold Malmberg y sr Eduardo de Veer a duna algun palabra di conseho hopi valioso. Pero ta lamentable cu e gobierno di Mike Eman ta asina terco y no kier scucha. Ni siquiera ta importa e gobierno di Mike Eman si trahadornan perde trabou.

"Nos ta pidi simplemente tempo y informacion independiente cu mester sirbi pa tur hende sa cuantor tin. Turismo ta nos unico pilar economico y nos lo NO ta complise di su destruccion", segun lider di Fraccion di MEP Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co