Nos no mester ta sabio ni tampoco core yama reunion den Parlamento pa sa pakiko coriente ta bay asina hopi na Aruba cada bes, te cu diasabra pasa nos a conoce un total blackout. E ta simpel. Esaki ta e consecuencia di e locura green di Minister Eman na unda cu miyones cu mester bay pa mantencion na companianan di utilidad di nos Pais ta bay pa paga Green Conference y tur e otro locuranan di Minister Eman den su afan di bende mundo un vision 2020 cu no ta realisabel sin cu e ta perhudica e Pueblo di Aruba malamente. Pesey e fayonan den suministro di awa y coriente cu tin ultimamente na nos Pais ta Minister Eman mes ta responsabel pa nan.

Trabou con cu ta na Green Corridor
Banda di e hecho cu fondonan di e companianan di utilidad ta bay pa paga e locura green di Minister Eman, bo ta haya e trabounan cu ta wordo haci con cu ta na entre otro Green Corridor cu ta causa cu casi tur siman un tubo di awa of un kabel di coriente ta wordo kibra cu consecuencia cu e barionan serca di e proyecto ta keda sin suminstro di awa of coriente. Tur esaki ta gastonana extra pa e companianan di uitilidad na nos Pais. Ta e mesun desaster aki a pasa ora contratista desconoci a haci trabou con cu ta den Caya Betico Croes y Linear Park promer fase. Aki tambe un cantidad di fondo di e companianan di utilidad mester a bay pa paga pa tur e erornan aki cu a wordo haci den proyectonan y e comercio y Pueblo engeneral a sufri na grandi ora cu coriente a bay daniando nan benta y nan aparatonan elctronico.

Yama reunion no ta bay brinda solucion
Como Parlamentario nos por yama reunion cu Ministernan De Meza y Eman pa nan bin splica dicon tin tanto fayo den suministro di coriente y awa na nos Pais. Pero Pueblo, bo ta echt kere cu Ministernan De Meza of Eman ta bay reunion pa bin bisa bo e berdad? Bo ta echt kere cu e director di WEB ta bay bin bisa bo e berdad? Pueblo, bo a yega di lesa kiko e sentencia di e ex director di WEB ta bisa di e directornan cu no bay na amen di Minister, kiko ta pasa cu nan na man di Gabinete Eman? Mirando esaki nos ta duda cu un reunion lo bay brinda transparencia of solucion pa e fayonan den sumistro di coriente y awa.

Durf di bisa ta basta
Locual nos mester haci como Pueblo ta habri nos wowo y mente. Si nos kier cambio, e no lo bin cu un simpel reunion. E cambio lo bin ora cu mas hende DURF di halsa nan VOZ y mustra nan desacuerdo y bisa ta basta. Y mas cu claro, ora yega e momento pa vota, vota conciente y no vota mas pa un locura di vision 2020 bon mercadia pa Minister Eman.

31 juli 2016

Expresionnan haci den e articulo aki no necesariamente ta refleha opinion di ArenaPoliti.co