Gabinete ME II: Prome Minister Eman y Minister Sevinger a bishita e area unda ta construi 13 mini-park y mini cancha deportivo pariba di brug
ORANJESTAD – Prome Minister Mike Eman y Minister di Infrastructura Benny Sevinger, hunto cu e team di DOW y Caribbean Infrastructure Company NV a bishita tur e puntonan den e area di Savaneta te na Weg Fontein unda ta bay construi mini parke y cancha di bala riba e ruta di Green Corridor. E aspecto aki di e proyecto Green Corridor tambe tin vision di mehoracion di calidad di bida pa e ciudadanonan, particularmente di esnan pariba di brug.
Caribbean Infrastructure Company NV (CIC) ta e contratista cu ta maneha e proyecto di Green Corridor. Na cada punto ingeniero Carlos Zubieta di CIC y ingenieronan di DOW, Swinda Dijkhoff y Jossy Kock, cu mapa den man a mustra e mandatarionan unda cada minipark y cancha ta wordo construi. Di e forma aki e mandatarionan a haya un miho bista di e proyecto. E Ministernan tabatin e chens pa agrega algun deseo, basa riba combersacionnan cu a yega di hiba cu habitantenan di pariba di brug. Asina, algun parke a wordo movi un poco pa p.e. matanan di kwihi existente cay den henter e diseño. Tanto Prome Minister Eman como Minister Sevinger, a expresa pa area di stacionamento ta bon regla, na e parkenan y dilanti di e casnan cu no tin garashi.
Riba henter Green Corridor Gobierno a constata cu tin suficiente espacio pa crea den e diseñonan sea un mini parke di recreo y area cu mashinnan pa haci ehercicio, mientras cu unda tin espacio mas grandi hasta a pensa pa bini cu mini cancha deportivo cu ta multifuncional. “Tur esaki ta forma parti di e vision di un Green Corridor,” Prome Minister Eman a bisa na final di e bishita diahuebs merdia riba e ruta di Savaneta te San Nicolas.
Mirando e solo fuerte cu tin na Aruba, a pidi specialmente pa na algun di e miniparkenan cu no tin suficiente sombra, y cu tin espacio, pa pone algo estilo di un Gazebo, manera cu a haci den barionan cu a wordo renoba na Juwana Morto, Savaneta y Pos Chiquito.
Zubieta den su splicacion na e mandatarionan a bisa cu tur e miniparkenan tin e mesun diseño, pa e ta reconocibel como parti di e proyecto Green Corridor. Ta trata di diestres mini-parke y mini cancha deportivo, di cual e prome ta e Linear Park di Pos Chiquito cu ta cuminsa unda e actual brug di Spaanslagoen ta.
Inclusion di e mini-parkenan y areanan di recreacion den e Green Corridor ta crea un miho calidad di bida pa e ciudadanonan. Esaki, Prome Minister Eman a splica, ta contrario cu pasado. Semper a construi, pero nunca a haci esaki cu e ciudadano den mente. “Esey ta e diferencia awor. Tur loke cu nos haci ta teniendo cuenta con esaki por brinda e ciudadano un miho calidad di bida,” e mandatario a expresa. E meta di e parkenan ta pa trece e habitantenan di e bario hunto, pa socialisa of haci deporte of ehercicio, di chikito te na esun di mas grandi.
Expresionnan haci den e articulo aki no necesariamente ta refleha opinion di ArenaPoliti.co