Un di e puntonan mas cardinal pa partido UPP for di tempo cu ela wordo funda ta, banda di Enseñanza y Arubianismo, e aspecto di "Good Governance" of Bon Gobernacion.
UPP a dedica extra atencion den su programa di partido na e topico aki, y a amplia y desaroya un cantidad di puntonan pa asina mira con por rescata Aruba y e pueblo for di e abismo cu e sistema di patronahe y clientelismo politico a hinca nos aden.
UPP ta wak "GOOD GOVERNANCE" como un instrumento hopi importante pa mara man di e politiconan cu ta uza gobernacion pa enrikese nan mes y nan compinchinan mas y mas y ta keda hinca pueblo cu proyectonan dudoso y cu ta hole na corupcion.

Den un comunicado anterior caba UPP, tratando e aspecto di All-Inclusive pa hotelnan, a denuncia e posicion intransigente di Otmar cu ta haci cu e kier sin ningun clase di discusion habri, pa pasa e ley aki den strot di Parlamento y di e pueblo. Pushando esaki, na vispera di aña di eleccion, nos ta mira esaki como un instrumento pa duna e minister di Turismo mas poder ainda pa e haci y deshaci riba tereno di All-Inclusive, ya cu ta e ta esun cu lo por duna excepcionnan riba e ley aki.
Esaki ta habri caminda tambe pa corupcion unda cu lo por tin pagonan pa fabornan haci.
Nos a adverti pa e hecho cu pasamento di ley aki ta habri posibilidad pa “wheel and deal” na su antoho.

Tambe nos por a tuma nota, con e minister aki, por ehempel riba tereno di scheepvaart, awor ta papiando di bay privatisa Directie Scheepvaart, cu ta treciendo placa aden pa e caha di gobierno.
Mientras cu ta papia bunita, e "bottom line" di esaki ta, cu atrobe placa cu mester bin den caha di gobierno, ta bay wordo staciona na un NV, a la ANSA NV, pa asina por tin "grip" riba e fondonan aki.
NO KEDA strañá ora bo wak cu e NV-nan aki tambe ta bay financia p.e. conciertonan cu ta bin Aruba, pa yuda e promotornan amigo di e forma aki.
Esakinan hustamente ta loke cu UPP kier evita, pa medio di e concepto di reglanan di "Good Governance".

Cu introduccion di un NV asina pa scheepvaart, e Otmar ta bolbe haya oportunidad di yuda su compinchinan cu salarionan barbaro, mescos cu a sosode na ANSA NV, Aruparking, Arubus, ATA, etc.
Na mesun momento creacion di un NV asina ta duna oportunidad pa emplea campañadornan, mescos cu el a haci cu Aruparking.
Pues ta pinta un situacion bunita, pero e intencion ta pa e tin mas cos di bisa riba e placa, cu segun nan mes ta bisa cu ta 25 miyon florin pa aña.
Esta, nan por haci y deshaci cu esaki na nan antoho. Y e caha di placa di pueblo lo no haya e placa aki pa paga of cubri cosnan esencial den nos comunidad, manera p.e. un Educacion liber. Na momento cu gobierno no por subsidia enseñanza, ta cerca e pueblo ta bin bek, ta cerca e mayornan ta bin bek cu aumento p.e. di schoolgeld.

Pues UPP ta fuerte den su ponencia pa mara man di e politiconan.
UPP ta kere cu Parlamento di Aruba mester para duro pa esaki tambe, esta pa introduci reglanan di "Good Governance".
Hustamente - pa evita cu tiponan manera Otmar ta sigui abusa di gobernacion, mescos cu a sosode den e Fondo Desaroyo San Nicolas unda cu e por a "get away" - ta importante pa nos tin reglanan di "Good Governance".
UPP ta consciente cu hopi politiconan, incluso den nos Parlamento, no ta gusta esaki mucho, pasobra hopi ta carga e speranza di por bay sinta den e stul di gobernacion y cu man mara bo lo ta limita den bo accionnan.

Mester evita cu hendennan manera Otmar, ta probecha di un sistema di gobernacion y ta percura, cu ayudo di stroman, pa yega na negoshinan y obviamente asina garantisando su mesun porvenir.
P'esey reglanan di "Good Governance" mester bin na vigor mas pronto cu ta posibel. Nos NO POR keda warda te un proximo eleccion, pasobra aña cu ta bin, e aña di eleccion, UPP ta mira cu e situacion lo bira peor.
E Gang di Alibaba ta keda chikito banda di e ministernan di Gabinete Mike Eman II.
Lo purba tur manera pa complace hende pa haya voto.
Lo bay na faborece mas ainda compinchinan politico, cu fabornan for di sla, manera ta sosodiendo caba. Djis wak kico ta pasando cu asunto di dunamento di tereno y permiso pa cambio di destinacion di tereno. Lo reparti placa y propiedad di pueblo y despues e PUEBLO, cu no a wordo invita, ni ta forma parti di e fiesta, lo ta esun cu lo mester bay paga pa e fiesta.

Mas cu Otmar keda sinta como minister, nos ta kere cu e lo sigui enrikese su mes mas.
Den reglanan di Good Governance, UPP ta mira como importante cu un persona cu tuma cargo publico, sea como minister of parlamentario, mester duna cuenta di su estado di propiedadnan, entradanan y debenan, pa asina por controla na final di un periodo si un persona asina por a enrikese su mes den e funcion cu el a carga. Asina mi kier recorda pueblo, cu na momento cu mi a tuma posicion den Parlamento y despues como minister, boluntariamente mi a haci tal. Esta di duna cuenta di mi propiedad y entradanan y debenan, como unico politico na Aruba, y esaki sin cu ley ta pone mi haci tal. Mi a haci esaki pasobra mi ta kere den esaki.

Si nos tabata tin un sistema asina, anto awe nos por sa cuanto cada minister tabata tin prome cu nan a bay den funcion y cuanto nan tin ora e periodo a caba. Asina aki tambe nos ta evita cu ministernan y politiconan por sinta enrikese nan mes riba custiya di pueblo, anto e pueblo t’esun cu tin di paga e cuenta den, no e proximo dos of 3 añanan, sino den proximo 20 pa 30 añanan.
8 aña di gobernacion di Gabinete Mike Eman ta nifica cu pueblo a wordo poni riba e altar di sacrificio, unda cu esun cu a nace awe, aki 30 aña ainda ta pagando cuenta di e malhechornan.

P'esey un biaha mas, UPP ta haci un apelacion na Parlamento di Aruba, wak e puntonan di Compromiso Nacional cu UPP a trece padilanti caba, y mira pa ehecuta esakinan awor, y no warda pa den aña di eleccion - mescos cu tabata 8 aña pasá y 4 aña pasá - zwaai cu ley di Klokkenluiders, ley di Financiamento di Partidonan Politico, ley di ombudsman, ley di referendum, e.o. cu keto bay no por mira luz di dia.
Aruba Quo Vadis?


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, augustus 7, 2016

Expresionnan haci den e articulo aki no necesariamente ta refleha opinion di ArenaPoliti.co