Dia pa dia e ta mas bisto y obvio con Benny Sevinger a hiba su maneho di infrastrcutura. E pueblo mes no a wordo yuda mirando e hecho cu tin mas cu 11.000 famia wardando un pidi tereno pa por construi un cas y asina tin un hogar pa nan famia. Pa esnan cu a pidi un pida tereno na e manera legal y correcto, e peticionan aki no ta wordo honra. Peticionan si cu ta wordo honra ta esun cu ta bai directo pa minister via mail. Esnan cu haci peticion serca minister pa terenonan pa bende ta haya te hasta opcionan cual terenonan tin disponibel y tambe cu Benny Sevinger mes ta reserva e terenonan disponibel. Tin sigur 3 famia cu ta hayando tur tereno cu tin disponibel na Aruba. E no ta keda aki nan so sino intimo amigo di Benny Sevinger tambe ta parti di e fiesta aki, Te hasta coordinadornan cu ta traha riba bureau di Benny Sevinger ta haya terenonan commercial. E abuso aki no tin limite. Benny Sevinger ta e director y e KING of REAL ESTATE na Aruba. No ta manera pa abusa di tereno y propiedad di pueblo di e manera aki. Si tur esnan cu a haya tereno a haya esaki pa desaroya nos no tin ningun problema. Pero no por ta asina cu tur e hendenan aki a haya terenonan di pueblo pa haci negoshi cu nan y bira miyonario riba custia di pueblo. Den pasado a ser papia hopi di un bus pa bin busca hendenan di MEP. Awe cu AVP ta den gobierno nan a pidi WODC bin investiga tur ministro di MEP y te awe no por a haya ningun prueba di corrupcion. E pregunta principal awor ta si Mike Eman lo pidi WODC investga su man drechi Benny Sevinger riba e fiesta cu tereno. E pregunta ta, ki dia e BUS lo bin busca Benny Sevinger. Corrupcion no ta solamente horta pueblo pero corrupcion tambe ta priveligia semper e mesun grupo pa e grupo haci negoshi cu tereno di pueblo. Corrupcion ta speculacion cu tereno di pueblo. 
Mirando tur e pruebanan cu tin y cu a ser publica hopi ta puntra si ministerio publico ta lanta y si nan mes ta dispuesto pa haci un investigacion ambtshalve. Lo ta bon pa mirando cu ministerio publico tin tur e toolsnan pa haci un investigacion forensico mira e cuentanan di banco di tur e ministernan. Mester wak con e cuentanan tawata na anja 2009 y con nan ta awe. Esaki ta tarea di ministerio publico y no tarea di parlamento di Aruba.

Expresionnan haci den e articulo aki no necesariamente ta refleha opinion di ArenaPoliti.co