Otmar Oduber (POR): POR ta para pa gobernacion basa riba etica, moral y integridad
A solicita audiencia y entrega documentonan na Ministerio Publico
Denuncia a wordo entrega contra diferente actonan cu ta considera cu moralmente y basa riba etica, no ta cuadra cu bon gobernacion. No por ta asina cu terenonan di pueblo cu ta den opcion ta wordo bendi pa sumanan miyonario. A tuma nota cu ta hopi di e acusacionnan aki tin ultimamente y pues mi ta kere ta responsabilidad di cualkier politico of ciudadano pa denuncia e actonan aki. Mester crea un gobernacion basa riba integridad como cu esaki ta loke cu ta spera di bon gobernacion y di politiconan cu ta maneha fondo y e vision cu tin pa Pais Aruba, segun lider di POR Otmar Oduber.
A base di e documentonan cu a ricibi y cu a presenta recientemente na comunidad referente corupcion cu terenonan, a entrega e documentonan na Ministerio Publico (OM) y haci peticion pa por sinta cu Sr. Olthof pa splica di e contenido. Mientras tanto mas documento ta sigui drenta y ta pone esakinan den man di autoridad pa nan haci nan trabou. ‘Nos no tey pa persigi ningun hende, pero si pa denuncia actonan robes como cu e cosnan aki mester yega un fin. No ta e cuestion cu ta participa na un politica sushi of na un politica di intimida/insulta hende. E ta e aspecto di tin bon gobernacion, di critica e hecho cu tereno di pueblo no ta cos pa haci negoshi cu ne. Tereno di pueblo tey pa un ciudadano traha un cas riba dje, pa un comerciante construi y crea labor pa comunidad y no pa wordo bendi y pa enrikese riba dje.'
Finalmente sr. Oduber a bisa cu un di e puntonan di accion cual ta bay wordo lansa diamars venidero ta: Kier saca ful e aspecto di otorgamento di tereno for di man di Minister. E Minister tey pa pone un maneho dilanti, pa pone condicionnan y rekisitonan. Departamentonan concerni a base di e rekisitonan aki ta atende cu e permisonan na un forma transparente y automatisa cu un sistema unda cu esun cu a aplica por monitor unda su papelnan ta. Esaki ta un di e compromisonan cu E Forsa Nobo ta para p’e.
Expresionnan haci den e articulo aki no necesariamente ta refleha opinion di ArenaPoliti.co