Elton Lioe-A-Tjam (ABO): Acusacionnan MinJus no por termina den un otro ‘Doofpot’. Tin suficiente caba!
Un siman a pasa, despues cu e minister di Husticia a haci algun declaracion/acusacion hopi pisa, pero keto bay ningun denuncia of algo similar a wordo entrega na Ministerio Publico (OM) pa cuminsa investiga locual a wordo declara publicamente.
Na diferente ocasion, varios partido politico (incluso esun di e minister mes) a yega di entrega denuncianan cerca Ministerio Publico pa posibel actonan castigabel, cometi pa politiconan. Esaki nan tabata haci semper y cuando nan tabata kere cu nan por a saca probecho politico. Pero den e caso specificamente aki, nos no ta papiando di oponentenan politico. Aki nos ta papiando di dos miembro di e mesun partido y den e mesun gobierno. Aki nos tin e titular di Husticia declarando publicamente no uno, pero varios posibel actonan castigabel cometi pa su ex-colega. Pero ainda despues di un siman, ningun hende por haya e caminda pa OM.
Un postura hopi preocupante y cuestionabel. Pasobra:
- E declaracionnan/acusacionnan no a wordo haci pa un ‘niet zomaar iemand’. E declaracionnan/acusacionnan a wordo haci pa e titular maximo di husticia;
- E declaracionnan/acusacionnan tampoco tabata dirigi na cualkier otro ciudadano, pero nan a wordo dirigi na un ex-colega (pues un otro ‘niet zomaar iemand’);
- E declaracionnan/acusacionnan no ta referi na un hortamento di pastechi, pero nan ta referi na actonan castigabel hopi serio;
- Un di e tareanan principal di e minister di Husticia ta, ‘de opsporing en vervolging van strafbare feiten (LV Instelling ministeries, AB 1991 GT 61);
- E minister di Husticia ta esun responsabel pa e Ministerio Publico y den e calidad aki e por pidi e ministerio pa yud’e cumpli cu un di su tareanan principal.
Awor straño cu den un aña electoral, unda diripiente tur politico tradicional tin atencion y solucion pa con pa combati criminalidad, ningun kier duna e bon ehempel y haci un denuncia na OM. Pasobra kisas aki ta trata di e top di esunnan den gobernacion? E supuesto ‘big fishnan’? Esunnan cu a drenta cu 10 florin den nan saco, pero cu awendia ta miyonario? E miedo pa cu si realmente e declaracionnan/acusacionnan wordo investiga, mas holo desagradabel lo sali dal pueblo, p’esey mester mantene e beerput bon cera?
Si algo similar lo a wordo declara pa of di e homber of muhe comun, pues e ‘small fishnan’, basta dia e declaracionnan/acusacionnan lo a wordo investiga. Den e caso specifico aki, e declaracionnan/acusacionnan ta di esun cu ta responsabel pa husticia. Esun cu mester sa of cu por haya sa exactamente kico ta pasando den e seno criminal.
Straño cu poco atencion ta wordo duna na e asunto aki pa cierto medionan di prensa. Parce manera cu nos ta den un aña electoral, hopi esfuerso ta wordo haci pa laga pueblo lubida e declaracionnan/acusacionnan aki lihe. Pero a pesar di e esfuersonan aki y cu algun hende kier haci comosifuera cu e declaracionnan/acusacionnan tabata nada otro cu gritonan ‘emocional’ y politico di e titular di Husticia, nan ta keda declaracionnan/acusacionnan serio haci pa un ‘niet zomaar iemand’ na e adres di un otro ‘niet zomaar iemand’.
Si realmente gobierno kier mustra seriedad den e combatimento di criminalidad, e declaracionnan/acusacionnan mester wordo investiga, enbes di trata di hinca nan den un otro ‘doofpot’. Cu un investigacion serio y transparente por tin como consecuencia cu henter e gabinete ta culpabel, siendo cu e tabata na altura di e posibel actonan castigabel pero a scoge pa no haci lo corecto, ‘SO BE IT’. Pueblo no a vota pa un grupito privilegia enrikece su mes y sigur no pa destrui e pais aki y su futuro generacionnan.
Si e mandatario di Husticia (of gobierno) no haci lo corecto, ainda Ministerio Publico por duna e bon ehempel y cuminsa investiga e declaracionnan/acusacionnan serio aki. Ministerio Publico siendo un organo independiente por haci esaki sin un denuncia oficial of un instruccion, manera e declaracionnan/acusacionnan ta serio, a wordo haci publicamente pa e minister di Husticia y teniendo cuenta cu esunnan envolvi no ta ‘niet zomaar iemand’. Ban wak si realmente no tin ‘Klasse Justitie’ aki na Aruba, of atrobe ta pueblo su ‘percepcion’. E asunto aki no por termina den un otro ‘Doofpot’. Tin suficiente caba!
(www.aboaruba.org, This email address is being protected from spambots. You need JavaScript enabled to view it.)
Expresionnan haci den e articulo aki no necesariamente ta refleha opinion di ArenaPoliti.co
Articulo similar
7 motibo pa laga Pueblo eligi su Gabinete
Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...
Sigui lesa...