Nos a tuma nota di varios declaracionnan den e ultimo dianan aki, cu nos por bisa ta pone hende su lananan reis. Nos ultimo comunicado hustamente a atende e caso di criminalidad y di seguridad aki na Aruba, unda cu nos a mustra cu ta hopi esencial pa atende cu asunto aki, mirando cu ta necesario pa nos bolbe crea e confianza, e trankilidad y felicidad den nos pueblo. Nos pueblo mester por cuminsa sinti su mes sigur. Pero e declaracionnan di ultimo luna aki y mas ainda di loke un ciudadano a sali declara fin di e siman aki, hustamente ta contribui na no solamente mas asombro, sino un sentimento cu Aruba parce di ta den gara di crimen organisa.

UPP a tuma nota algun dia atras di e declaracion di minister Bermudez, na ocasion di e instalacion di e “afpak team”. Asina nos por lesa riba 24 ora.com loke Bermudez a declara: "internacionalmente nos mester mantene nos reputacion na ordo y tambe localmente mester mantene un sistema caminda cu no ta haya cu baho mundo ta mescla cu alto mundo." 

Cu e declaracionnan di ultimo simannan nos UPP ta puntra su mes si ya caba e baho mundo no ta diki diki meti den e alto mundo? Nos por a mira declaracion di minister Dowers contra di ex-minister Oduber. Como minister di Husticia, sigur esaki ta un “onsmakelijke vertoning” y cu ta pone nos pensa cu tanten nan tabata cu otro tur cos ta wordo tapa. Dirpiente cu Otmar Oduber tabata tin su critica riba e maneho di minister di Husticia, Arthur Dowers ta haya bon pa basha abou, den un forma publico pero den un forma di mitar informacion.

Despues nos ta haya e situacion di un preso cu ta haya “verlof” y ta cay den full un controversia y hasta haya airtime na nos planta nacional pa ataca oponentenan politico, sigui pa un declaracion di minister di Husticia cu atrobe ta bira uno controversial. UPP a spera cu despues di tur e asuntonan aki cu a bin padilanti, Ministerio Publico a haci su trabou y cuminsa un investigacion riba e diferente declaracionnan. Particularmente esunnan entre e dos ex-coleganan di Gabinete Mike Eman II.

Pero kico nos ta wak??? Manera semper ta e caso e ultimo añanan Ministerio Publico ta keda keto. Hustamente e tipo di actitudnan asina aki ta pone nos pueblo, e comunidad di Aruba, perde confianza den nos husticia.

Y como no sifuera poco, nos ta wak cu fin di siman un ciudadano ta bin haci declaracionnan hopi comprometedor pa loke trata e mesun preso cu a haya “verlof”, unda e ta mustra con acerca e preso aki ta cu ministernan y parlamentarionan di AVP. No ta nos intencion di den discusion riba e contenido di e declaracionnan, pero si nos ta haci un apelacion na Ministerio Publico pa studia e casonan aki. No keda na soño y laga esaki pa supuestamente wordo regla bou di politiconan. Henter e capitulo aki tin ingredientenan, di eleminacion, encubrimento, negoshi di droga, manipulacion, anto te den nos alto rangonan di nos gobernacion. Acaso minister Bermudez ya a ripara cu e baho mundo lo a penetra te den su cura??? Kizas e no ta laat cu esaki??? Of su persona a haya un opdracht di Hulanda pa haci tal??? En todo caso e declaracion aki di Bermudez ta enfatisa e ponencia den un comunicado anterior di UPP cu loke Dowers a basha abou riba su colega cu: “...e criminalnan eyfo tin un competencia masha grandi cu nos propio gobernantenan”.

Si Ministerio Publico no haci ningun intento pa haci e investigacionnan necesario y si e tutu aki sigui wordo trata na e nivel cu esaki ta bayendo awor, unda un ta acusa otro, pero tampoco no ta haci ningun denuncia, UPP ta mira cu esaki ta un ingrediente pisa pa Hulanda awor bay tuma tambe control di nos husticia na Aruba. Y esaki pasobra nos mes a busca esaki. Ta tristo pa mira con mas di 30 aña despues poco poco bou di e gabinete di Mike Eman II, ta sigui mina nos autonomia, dor di permiti bagamuderia sosode bou nanishi di Mike Eman mes y dor di permiti metemento directo den nos husticia.

Un biaha mas, e declaracionnan haci aki dor di un ciudadano, cu tabata tin su manera pa yega te na cas di partido AVP, y na momento cu minister- y parlamentarionan tabata den reunion eynan, mester lanta Ministerio Publico lanta for di soño. Tambe nos ta kere cu parlamento no por sigui tapa e asunto aki mas y mester tuma su pasonan necesario den esaki. Mescos tambe Mike Eman, kenda ta full perdi desde cu un di su ministernan, esta Dowers a habri afor contra su mesun ex-colega. Mike Eman mester bin duna palabra, y stop di hunga “mooi weer” den barionan di Noord poniendo luz. Nos pais ta den rumbo pa un decadencia total y keto bay hopi ta esnan cu no kier mira esaki. Ora ta laat nos tur lo yora malaai.


4 di maart 2017

Booshi Wever
Lider UPP
Brazil 163

Expresionnan haci den e articulo aki no necesariamente ta refleha opinion di ArenaPoliti.co