E problema di Insel Air no ta keda solamente na trahador, pasahero y aviacion entre e islanan perhudica. E caso aki tin un rabo masha largo y hasta ta toca e Controlaria General di Aruba y hunto cune e gobernacion di nos Pais. E motibo ta simpel. E CEO di Insel Air, sr Nuboer, ta e unico miembro di e Colegio na cabes di Controlaria General di Aruba (ARA) y su envolvimento den e escandalo di Insel Air ta rekeri su retiro di e Organo Halto aki di nos Pais. Pero como cu sr. Nuboer no ta tuma honor na su mes y como cu Eman y Presidente di Parlamento tin man riba su cabes, Controlaria General di Aruba ta pasando den un berguensa nunca antes bisto y ta victima di mal gobernacion y influencia politico.

Integridad di Nuboer ta cuestionabel 
E Colegio di Controlaria General normalmente mester consisti di 3 miembro, pero awor aki ta sr Nuboer so ta eynan. Pues ya caba ARA no por tuma decicion manera ley ta prescirbi. Banda di esaki e caso di Insel Air cu ta concerni sr. Nuboer como CEO di e compania, ta trece duda den su integridad y hunto cu esaki ta atacha e bon nomber y e inparcialidad di e Organo Halto aki di nos Pais. A purba scapa cara door di bisa cu como CEO sr Nuboer no tabata encarga cu e parti fiscal, pero solamente cu entre otro e parti di mantencion. Pero awor cu investigacion ta mustra cu tin malversacion y fraude pisa cu piesa na Insel Air Aruba, nos ta puntra nos mes cu ki cara Eman y Presidente di Parlamento ta bay sigi pone man riba cabes di sr. Nuboer? E caso di Insel Air aki ta uno grave cu ta pone cu mester cuestiona e integridad di sr. Nuboer como e unico miembro di e Colegio di ARA.

Eman y Presidente di Parlamento ta complice 
Cu awe ARA no por cumpli cu e trabou di control riba Gobierno manera Ley ta prescirbi ta debi na e fayo di Eman y di Presidente di Parlamento. Eman ni e Presidente kier atende cu nos preguntanan official y e peticion pa yama un reunion di Commissie Landsuitgaven pa trata e caso serio aki cu ta atcha ARA su funcionamento. Banda di esaki, e Presidente tampoco tin fin di laga Parlamento dicidi riba ken ta bira e miembronan nobo pa e Colegio di ARA. Como cu e Fraccion di AVP no a haya nan kier pa nombra solamente hende cu ta afilia na partido AVP den e Colegio, pesey awe ARA su Colegio no ta completo y no ta trahando conforme ley. Un danio grandi ta wordo haci asina na ARA y esaki ta un muestra palpabel di e mal gobernacion di e gobierno aki y e influencia politico di cual Eman y Presidente di Parlamento ta complice di dje.

Mester bin cambio pronto 
E danio haci na ARA merece mas atencion. Eman y Presidente di Parlamento a mustra caba cu nan ta apoya fechoria enves di atende cu nan. Nos Pais mester un cambio y den un proximo gobernacion di MEP nos lo percura pa Colegio Halto di nos Pais manera Controlaria General Aruba por bolbe recobra nan respet y haya espacio pa haci nan trabou sin influencia politico manera ta e caso awor.

13 maart 2017

Expresionnan haci den e articulo aki no necesariamente ta refleha opinion di ArenaPoliti.co