Despues di a warda mas di un luna porfin Presidente di Parlamento a yama e reunion cu opocicion a pidi pa atende cu e caso bergonsoso di Minister di Labor kende ta bou sospecho di soborno y labamento di placa. Remarcabel ta cu Presidente di Parlamento a yama e reunion importante aki poniendo un punto di agenda adicional den cual un parlamentario di AVP a pidi pa trata criminalidad organisa na Aruba. E punto aki no tin ningun relevancia pa wordo atendi hunto cu e caso di Minister Croes, pero Presidente di Parlamento a agenda e peticion aki djies pa AVP por a haya e excusa perfecto pa por desvia atencion di e caso serio di nan Minister di Labor. Di e manera aki Presidente di Parlamento a mustra su mala fe y na nos opinion e ta un berguensa grandi cu e propio Presidente di Parlamento ta stroba e funcionamento di Parlamento.

Desvia atencion pa no atende cu realidad 
E ta un berguensa grandi cu e propio Presidente di Parlamento ta presta su mes pa haci e wega politico di pone punto di agenda extra pa por desvia atencion di e realidad amargo cu Parlamento mester deal cune. E unico punto relevante ta si e Minister di Labor cu ta bou sospecho di soborno y labamento di placa por conta cu e confiansa di Parlamento manera cu nos Constitucion ta stipula den Articulo 2.2 inciso 2. Esey ta e unico punto relevante cu Parlamento mester a debati riba dje. Pero door cu e Presidente di Parlamento a pone e punto di agenda criminailidad organisa, ela duna Fraccion di AVP tur chens pa bay haci politikeria cu e sospecho cu tin un ambtenaar di fam Croes cu lo ta tras di planeamento di atraco na Hulpbestuurskantoor. Un caso cu no tin ningun relevancia pa wordo trata den Parlamento ya cu e ta wordo debidamente trata cune door di autoridad hudicial,pero cu a sirbi pa AVP purba desvia di e realidad cu e gobernacion di nos Pais ta malamente mancha cu un Minister bou sospecho grave.

Link cu crimen organisa 
Door di pone e punto di criminalidad organisa hunto cu e punto di agenda di e caso di Minister Croes, e Presidente di Parlamento mes ta link e caso di e mandatario aki cu crimen organisa. Aunke cu e Presidente di Parlamento kier a refuta e link aki, e realidad ta mustra nos otro. Den e caso di Minister Croes awor ta sali na cla cu tin sospecho tambe di traficacion di hende. Un delito cu ta wordo cometi den forma di crimen organisa. Pero esaki ta un sospecho cu nos por a spera pasobra no ta pornada RST tambe ta envolvi den e caso bergonsoso aki. Pero net riba esaki ningun Parlamentario di AVP kier papia.

Stroba Parlamento di funciona 
Ta di lamenta y condena cu Parlamento no a haci su trabou debidamente den e caso di Minister Croes. Mas condenabel ta cu e propio Presidente di Parlamento ta esun cu a stroba Parlamento di funciona. Nos Pais mester un cambio. Nos merece un Presidente di Parlamento cu conoce nos leynan y tin e fatsoen politico pa haci lo corecto enves di just sigi ciegamente locual su lider di partido ta instruie pa haci.


16 mei 2017

Expresionnan haci den e articulo aki no necesariamente ta refleha opinion di ArenaPoliti.co