Raad van Advies a termina su evaluacion riba e cambionan den e presupuesto 2014. Despues cu gobierno, a base di e acuerdo cu Mike E a firma cu Hulanda dia 3 di juli 2014, a trece e cambionan conforme e recomendacionnan di e secretariado di CFT, Raad van Advies a manda su conseho- y conclusionnan pa gobernador, gobierno y parlamento. E documento aki a wordo ricibi cu repudio door di personanan cu ta cuestiona e maneho di e gobierno actual, y di otro banda e partido na mando no a perde tempo pa elogia y expresa nan satisfaccion cu e trabou di e Conseho Consultativo.

Raad van Advies anteriormente a investiga e presupuesto 2014, y su ponencianan a wordo severamente critica y ignora door di e partido na mando, mientras otronan no a perde un chens pa ripiti e partinan di e rapport cu tabata mustra un falta di transparencia y maneho di parti di gobierno.

Obviamente tur hende tin e derecho pa expresa nan opinion, pero loke no por wordo permiti ta cu ta cuestiona e credibilidad di e integrantenan di e Organo Consultativo, cu e unico meta pa silencia e mensahe exponi den e documento, si bo ta di acuerdo cu ne of no (“kill the messenger and you will kill the message”).

Dia 26 di september 2011 minister Donner di Hulanda a haci entrega di e resultado di e investigacion cu e “Wetenschappelijk Onderzoek- en Documentatiecentrum (WODC)” a haci riba peticion di sr. Mike E dia 25 di november 2009. Mike E a puntra Hulanda pa investiga e “Staat van Bestuur” di e gobierno anterior. E rapport a defini, den mi concepto den un forma obhetivo, kiko e problemanan ta cu un Pais chikito manera Aruba ta confronta, y tambe a formula recomendacionnan pa reglamenta un mihor forma di gobernacion. Un aspecto importante di e investigacion a concentra riba e pregunta si na Aruba e ‘waarborginstituties’ ta suficientemente independiente y por eherce control debido riba gobierno.

WODC ta yega na e conclusion cu supuestamente Aruba lo tin suficiente mecanismonan di control, pero cu en realidad no ta cumpli cu condicionnan basico pa eherce e trabou debidamente. WODC ta menciona cu por ehempel e efectividad di e funcionamento di instancianan manera Raad van Advies y Rekenkamer, a wordo perhudica door di scarsedad di personal cualifica.

Apesar di tur inconveniencianan, toch e dos instancianan ta logra produci relativamente hopi rapport di calidad, segun WODC, cu lamentablemente ta bira victima di e polarisacion politico existente na Aruba.

Lo elogia e rapport si por usa e contenido pa defende posicionnan politico, of lo critica no solamente e contenido, pero tambe e miembronan di e institutonan si encaso e no ta pas den bo ‘straatje’.

E unico forma pa evita polarisacion segun WODC ta promove transparencia y ‘onpartijdigheid’ na unda ta conseha pa: ‘het sluiten van lacunes in wet- en regelgeving, het uitbreiden van de wettelijke bevoegdheden van waarborginstituties, het inzetten van internet om transparantie te vergroten en het samenwerken met andere landen binnen en buiten het Koninkrijk. Het WODC denkt aan oplossingen in de sfeer van intervisie en controle, in Koninkrijks- of internationaal verband’.

UPP ya pa algun tempo caba ta expone e opinion, y a pone esaki den su programa di partido, pa mehora y optimalisa funcionamento di e gobierno door di e.o. mara e mannan di e politico, y stop patronahe politico a base di norma- y reglanan di "Good Governance", pero tambe door di ehecuta e recomendacionnan haci den e rapport di WODC. E parlamento como organo mas halto di nos democracia, mester cuminsa ehecuta su debernan di un forma mas independiente y responsabel cu ayudo di organonan consultativo cu ta haña tur espacio y personal pa por conseha parlamento di un forma imparcial y profesional.

Na final di cuenta e unico efecto di e polarisacion aki lo ta cu e pueblo lo wordo confundi y frustra aun mas, y cu tur atencion lo wordo desvia for di e problema real cu ta e mal maneho financiero di e gobierno actual.

Nos no mester perde for di bista cu e conclusion di Raad van Advies, cu razon of no, lo no kita cu nos tin un realidad amargo di e rapport di e secretariado di CFT cu a haci un investigacion basa riba e acuerdo cu Mike E a firma cu Rutte y Plasterk. Den dicho rapport ta poni tambe TUR e medidanan cu mester ser tuma riba lomba di nos pueblo pa motibo di e maneho financiero desastroso di e gobierno di Mike E. Y e conseho di Raad van Advies lo no kita cu e medidanan lo wordo imponi riba nos pueblo, y ta eynan nos concentracion mester ta, y no riba un polarisacion cu ta sirbi solamente pa desvia e atencion pa Mike E y su gobierno keda complace y yena saco di su financistanan di nan campaña.             

Den nomber di Union Patriotico Progresista – U.P.P.
Candelario – Booshi – Wever
Brazil, october 24, 2014

Expresionnan haci den e articulo aki no necesariamente ta refleha opinion di ArenaPoliti.co