Den mi ultimo articulo mi a señala cu apesar di tur inconveniencianan, manera scarsedad di personal cualifica y un budget limita, Raad van Advies (RvA) y Algemene Rekenkamer Aruba (ARA) toch a percura pa asesora e Parlamento di Aruba cu conseho y tambe criticanan al caso. Pero manera expone den e rapport di e Wetenschappelijk Onderzoek- en Documentatiecentrum (WODC) na 2011, ta importante pa no hinca ni RvA ni ARA den e discusion ni polarisacion politico existente na Aruba. Nan mester haña e oportunidad pa por eherce nan trabou den tur obhetividad, loke no ta facil riba un isla chikito manera Aruba.

Un ehempel bibo cu e advertencia di WODC tabata na su lugar, ta wordo demostra door di e forma con politiconan, parlamentarionan y gobierno a haña necesario pa fomenta polarisacion, disgusto y hasta rabia riba e instituto RvA y su miembronan, despues cu esaki a publica den dos ocasion nan investigacion di e presupuesto 2014 na juli y october 2014.

Na prome lugar e partido na mando a haña ta bon pa desacredita y ignora e resultado di e conseho cu RvA a haci a base di e presupuesto 2014 presenta door di e ex-minister di finansas Juan David Yrausquin (JDY). Pero historia lo demostra cu ta RvA tabata e prome instancia cu a bati alarma y a alerta Parlamento den un forma hopi enfatico pa no acepta e presupuesto y mande back pa un revision mas extenso door di RvA. Partidonan politiconan den oposicion, tanto esunnan cu representacion den Parlamento como esunnan cu no tin representacion, a tuma e advertencia di RvA na serio y a propone pa acepta e sugerencia di RvA, pero envano, pasobra e parlamentarionan di e partido na mando a aproba e presupuesto toch. Ta aki ta na unda gobernador a hañe obliga pa interveni y asina salbaguardia Aruba di e pio desaster financiero cu nos Pais lo a experiencia desde nos Status Aparte na 1986.

RvA cumpliendo cu su tarea, describi den nos Constitucion, a haña dia 2 di october atrobe e peticion di gobernador pa evalua e adaptacion di e presupuesto 2014 cu gobierno a haci a base di e investigacion haci door di e secretariado di Cft. RvA a haña necesario pa expone su pensamento tocante e legitimidad di e KB impone door di Hulanda, y a conclui cu e Rijksministerraad no a actua segun e reglanan stipula den Statuut. Nos por debati si e conclusion di RvA aki ta corecto of si ta competencia di RvA pa expresa un opinion riba e tema di legitimidad di e KB. En todo caso RvA no a keda para keto unicamente riba e aspecto huridico di e KB, pero a completa e tarea manera pidi door di gobernador, y a laga sa atrobe den un forma hopi directo cu Parlamento di Aruba a faya barbaramente pa aproba e presupuesto ficticio 2014, y tambe cu e investigacion di Cft a comproba e ponencia di RvA cu Aruba tabata rumbo pa un desaster financiero door di un gobierno cu a manipula cu cifranan. Danki Dios cu RvA a alerta nos pueblo, y tambe mester gradici gobernador cu a actua di un forma prudente. Ya caba varios expertonan tanto huridico como financiero, a vocifera nan opinion cu nos no mester perde mucho tempo riba un discusion academico riba e legalidad di e KB, lubidando nos situacion financiero desastroso y alarmante. UPP den un articulo anterior a vocifera su opinion cu ta cuadra cu e pensamentonan di e expertonan aki.

Gobierno hulandes a haci un apelacion caba na Raad van State pa investiga e legitimidad di e KB imponi riba e gobierno di Aruba, pero loke no mag di wordo permiti ta pa nos pueblo cay atrobe den e trampa di e gobierno y partido na mando pa desvia atencion for di e crisis financiero cu nan a hinca nos Pais aden.

P'esey mi kier urgi nos pueblo pa realisa cu no ta Raad van Advies y no ta nos gobernador mester wordo teni responsabel, pero cu ta Mike E. y su partido ta e culpabelnan y e autornan intelectual di e crisis actual. Ta Mike E. ta e culpabel y e motibo pa cual e gobierno di Reino mester a interveni. Ta Mike E. y su minister di finansas JDY ta esnan cu desde comienso di 2014 a acepta intervencion di Hulanda. Ta Mike E. ta esun cu dia 3 di juli 2014 a entrega nos autonomia, y ta Mike E. ta esun cu a acepta investigacion door di Cft, y tambe a acepta di lo incorpora tur e recomendacionnan di Cft sin mas den un presupuesto completamente cambia di 2014. Mike E mester a simpelmente firma "bij het kruisje", contrario na loke Angel Bermudes kier pa pueblo kere cu nan a pone loke nan tabata kier. Y no ta solamente Mike E y su ministernan incluso Angel Bermudes mester firma pa e cambio cu CFT a propone, pero awor ta e parlamentarionan tambe mester simpelmente bay grita "VOOR" pa e cambionan aki, pa asina ey Mike E y su gang bay impone e medidanan riba nos pueblo.

P'esey no mag di wordo permiti tampoco pa e gobierno aki ta esun cu lo mester saca Aruba for di e desaster financiero, pasobra nan a demostra cu te ainda nan no a siña nan les. Ainda nan ta keda priminti cielo riba tera, ainda nan ta keda manipula cu informacion y ta tira culpa riba tur hende pa e crisis constitucional actual, nan ta keda firma MoU pa loco, nan ta keda sponsor financiadornan di nan campaña politico, nan ta keda duna permiso na personanan indocumenta, y nan ta keda manipula cu cifra.

Y AINDA FALTA!
              

Den nomber di Union Patriotico Progresista – U.P.P.
Candelario – Booshi – Wever
Brazil, october 26, 2014

Expresionnan haci den e articulo aki no necesariamente ta refleha opinion di ArenaPoliti.co