Conferencia ‘Green Aruba – Europe Meets the Americas’ a finalisa den forma grandi diasabra ultimo. Ex-astronauta dr. André Kuipers, kende ta un medico di profesion prome cu el a bira astronauta, a tene un discurso sumamente interesante, informativo y alabes hopi entretenido pa e publico presente. E sala tabata yena pa gran parti cu hobennan di Aruba, cu a reserva nan diasabra pa asisti na e presentacion cu a tuma luga den un Renaissance Convention Center completamente yen.

Prome cu Prome Minister Mike Eman a introduci Sr. Kuipers, el a rindi na e fayecido amigo di Aruba, Wubbo Ockels, cu tambe tabata un astronauta den añanan 80 y cu despues a dedica su bida na promove, studia y como profesor na Universidad di Delft, a educa hopi profesionalnan riba e tema di sostenibildad. Prome Minister Mike Eman tabata hopi emocional ora e recorda Ockels, kende a haci hopi esfuerso pa pomove e idea di sostenibilidad bou hobennan na scolnan rond di Aruba. Ockels a pasa un temporada largo na Aruba y Eman a recorda cu ora cu e cana su su esposa, Doina, riba Linear Park, e tabata un custumber pa na final di e caminata nan pasa bishita Ockels y su casa riba nan yate Ecolution, cu tabata mara na e marina di Renaissance. Premier Eman a papia di e dedicacion cu Ockels a duna na preservacion di nos planeta, e sosten cu a duna na e vision di Aruba y e falta cu e ta haci. Tambe a menciona con su ehempel mester keda motiva un y tur riba e tema di sostenibilidad y preservacion di nos planeta.

Na final di e tributo na Sr. Ockels cu a fayece Mey ultimo di un cancer cu a wordo diagnostica aki na Aruba, Sr. Eman a duna un Bon Bini amical na Sr. Kuipers bisando cu Aruba a perde un amigo cu fayecimento di Wubbo Ockels, pero ta haya un amigo nobo den ex-Astronauta André Kuipers.

Prome Minister Eman hunto cu Andre Kuipers a presencia un video-clip cu a traha specialmente pa recorda e colaboracion y relacion cu Wubbo Ockels tabatin cu Aruba.

Andre Kuipers a duna un charla largo cu a hiba e titulo “Life As An Astronaut”, unda cu el a duna un splicacion con el a wordo recluta pa participa den e training y henter e proceso pa bay espacio y su adaptacion bek ora cu a ateriza na mundo.

Kuipers a splica cu e tabata un Astronauta Hulandes representando ESA (Agencia Espacial Europeo) cu a viaha den e nave espacial Ruso, di e tipo Soyuz. Su prome vuahe tabata abordo di Soyuz TMA-4, 19 di april, 2004 y cu a  bolbe mundo bek (abordo di Soyuz TMA-3) 11 dia despues.

Segun Kuipers, e viahe mas interesante y durante cua el a acumula mucho mas potret, conocemento y storianan interesante tabata su di dos viahe pa e Stacion Espacial Internacional. E di dos viahe a wordo anuncia 5 di augustus di 2009 y tabata yama ‘Expedicion 30 y 31’. Hunto cu dos otro astronauta, un Americano y un Ruso, Kuipers a wordo Lansa 21 di december di 2011, abordo di un Raket Ruso for di un base na Kazachstan y a bolbe mundo, aproximadamente 6 luna despues, prome di juli, 2012.

Kuipers por medio di potretnan a ilustra e publico un cantidad di aspecto interesante di vuelo espacial, entre otro, trahenan cu ta wordo uza den espacio, e pakico di e trahenan y con nan ta wordo traha. Den espacio tur cos ta “light” y ta bula facil, inclusive e cuminda y bebida. Kuipers a ilustra tur esaki haciendo uzo di videonan cu el a tuma su mes den espacio y cu tabata contene momentonan sumamente comico. El a splica con, den e stacion espacial, ta recycla tur cos. Ehempelnan di recyclahe di awa tabata varios riba e stacion espacial internacional, incluyendo recyclahe di urina cu ta wordo procesa den awa pa potabel.

Kuipers su specialidad durante di su estadia den espacio tabata den area di medicina, como cu e ta medico di profesion, pero segun e ta splica, ora bo ta den espacio, ta tur cos bo tin di haci. El a realisa un total di 21 experimento den orbita riba un variedad di tema: fisiologia, biologia, microbiologia, medicina, desaroyo tecnologico, fisica y tambe el a pasa hopi tempo observando mundo. E experimento mas conoci pa publico, segun Kuipers, ta trata desaroyo (crecemento) di mata den espacio: ‘Simia den espacio’. E experimento eya wordo haci den conhunto cu muchanan di scol basico. A compara e resultadonan di crecemento di mata na mundo (na scol) y den orbita riba e stacion espacial. 

E momentonan cu a proba di tabata hopi intresante pa publico tabata ora cu Sr. Kuipers a duna un presentacion di e imagen y videonan cu el a colecciona durante su estadia den espacio pa 6 luna largo. Miembronan di publico tabata pone asina hopi atencion cu por a tende un pin cay den e sala. E imagenan di mundo tabata inclui, daño cu hendenan ta causa na cierto partinan di mundo, pero tambe imagennan spectacular di Mount Everest y efectonan impresionante di particulonan solar riba nos atmosfera (aurora borealis), pero for di punto di bista pafo di mundo. Ex-astronauta André Kuipes a mustra tambe un bunita potret cu el a saca di islanan ABC for di stacion espacial, caminda por mira con cerca Aruba ta for di costa Venezolano (Punto Fijo).

Na momento di bolbe mundo, e astronautanan, Kuipers a splica e hobennan, ta pasa den un periodo di adaptacion y a mustra potretnan con e mester wordo yuda pa por move. Esaki ta asina pasobra despues di keda 6 luna largo den espacio, e musculonan y mas importante ainda, e wesonan ta descustumbra di gravedad (zwaartekracht) di mundo. El a mustra potretnan, di algun dia despues cu el a bolbe Houston, con su mama y yiu tabata yude cana.

Na final di su presentacion por a mira cu hobennan presente a keda hopi entusiasma y kier a conoce astronauta Kuipers y alabes saca potret cu n’e. E presentacion di Kuipers tabata un ispiracion pa e hobennan, riba e topico di sostenibilidad y dedicacion na medio ambiente y te hasta tabata tin hobennan cu a mustra nan interes pa bira astronaut, haciendo preguntanan con nan lo por yega den espacio un dia.

E amigo di Aruba tabata hopi entusiasma, di su banda, pa mira interes bou di hobennan pa siña di su viahenan, pero particularmente e interes grandi cu tin bou hobennan pa e topico di sostenibilidad.

Expresionnan haci den e articulo aki no necesariamente ta refleha opinion di ArenaPoliti.co