“Nos ta wak Aruba como un di e lidernan den e area di energia renovabel y sostenibilidad,” asina Malike Cummings, Comisionado di Energia y Utilidad di Turks & Caicos a expresa. El a forma parti di un grupo di representantenan di paisnan LGO cu a participa den e conferencia ‘Green Aruba: Where Europe Meets the Americas’. El a splica cu esaki ta su di dos biaha y ta masha satisfecho cu e reunionnan cu e grupo a sostene durante ultimo dianan. Den e encuentronan aki hunto a delinea strategianan cu ta bay yuda e otro islanan pa nan tambe por avansa den nan esfuerzonan pa sostenibilidad.

Jacqui Christians ta e representante di Pitcairn Islands, un LGO di Inglatera den Oceano Pacifico cu poblacion di 60 persona, ta reconoce e retonan pa su isla por desaroya un economia priva dor di incentiva e industria turistico. Pa medio di nan miembrecia den OCTA, ta purba di haya e recurso y sosten tecnico. Nan ta contento di por sigui e ehempel di Aruba den un escala mas chikito, pero cu e mesun enfasis riba sostenibilidad ya cu nan kier preserva nan recursonan natural. Teniendo na cuenta con isola e islanan, ta imperativo pa busca manera di genera nan propio energia for di solo y biento. “E conferencia aki tabata valioso den duna no solamente informacion, pero  tambe contactonan pa nos por bin un bon modelo di negoshi pa ehecuta.”

Na opinion di Trevor Graham, Director of Environment and Natural Resources pa e gobierno di St. Helena, Aruba ta demostrando liderazgo den e manera con ta comparti informacion y yuda otro islanan logra nan metanan di desaroyo economico mientras cu tambe ta haci esaki preservando e recursonan natural. St. Helena ta un isla entre Africa y Brasil cu un poblacion di 4.500 persona.

E grupo di representantenan di LGO perteneciente na Union Europeo tabatin un agenda paralelo na esun di e conferencia ‘Green Aruba: Where Europe Meets the Americas’. Entre otro a presencia e apertura di proyectonan manera ‘EcoGas’ y e ‘Solar Carport Park’ na Aeropuerto Internacional Reina Beatrix adicional na recoridonan di e parke di Molina di Vader Piet. E grupo a conta cu e guia di Cedrick Tilma, representante di Gobierno di Aruba na Union Europeo.

Expresionnan haci den e articulo aki no necesariamente ta refleha opinion di ArenaPoliti.co