Nos Pais na e momentonan aki ta conociendo un caos den cual te ainda no tin un presupuesto pa 2015 y riba dje esun presenta na Parlamento no ta cumpli cu e promesanan di e mesun Gabinete Eman na Pueblo. E caos no ta uno financiero so pero tambe riba nivel social tin hopi problema cu ta conduci na actonan di criminalidad creciente. Banda di esaki nos enseñansa tambe ta na candela cu casonan cu ta bin dilanti cu ta afecta e hobennan cu ta futuro di nos Pais. E economia di nos Pais tambe ta sufriendo un contraccion pisa. E refineria como un pilar economico pa nos Pais ta cay afor y turismo como e unico pilar economico ta conoce retonan grandi. Memei di tur e caos aki, nos Minister President a haya ta bon pa bay viaha pa Panama y Miami pa core di e caos pa asina no mester enfrenta problema. Nos Pais tin mester di un lider cu por enfrenta e caos aki y cu no ta core pa su responsabilidad.

Den tempo di crisis bo ta conoce un lider
Ta den tempo di crisis bo ta siña conoce un lider. Nos Pais na e momento aki mester di un lider cu ta duna cara na e problema y ta brinda e siguransa cu ta trahando na yega na un solucion pa nan. Pero nos Minister President ta demostrando cu e ta e lider cu no kier asumi e responsabilidad aki. Memei di e caos aki nos Minister President ta na Panama y Miami sacando portret y haciendo bishita di cortesia, trahando riba su ego personal y lubidando cu na su Pais e Pueblo ta den pena memei di e caos cu ta reina.

Tur cos tin su ora y tempo
Tur cos tin su ora y su tempo. Den gobernacion tambe esaki mester ta un regla di oro. Tin momento cu e Minister President mester por viaha pa representa nos Pais, busca aliado y oportunidadnan nobo. Pero cada cos tin su momento. Ora caos ta reina, un lider no por ta na un otro Pais. E mester tey na su Pais pa atende cu e problemanan, duna guia y tuma decicion na beneficio di e Pais. Mescos cu ora e ta na su Pais tin momento pa yuda verf den bario, pero den tempo di caos nos Minister President su prioridad mester ta tuma decicion.

Asumi responsabilidad of retira
Nos Minister President no por sigi core pa su responsabilidad y mester regresa y keda na su Pais pa atende cu e problemanan di nos Pais. Si acaso e no por of no kier, e ora ey e mester tuma su retiro. Pasobra awor aki mas cu nunca nos Pais mester un lider pa lidera di berdad y tuma decicion cu ta realmente ta na beneficio di nos Pais. E ora y tempo a yega, asumi responsabilidad of retira!

17 april 2015

Expresionnan haci den e articulo aki no necesariamente ta refleha opinion di ArenaPoliti.co