ORANJESTAD - Ayera Minister di Finanzas Angel Bermudez a anuncia cu Conseho di Minister a aproba diabierna 10 di april e nombracion di sr. mr. Roderick Lionel Croes como director nobo di e Departamento di Aduana. Ademas a keda nombra como directora di Departamento di Impuesto Sra. mr. Luenne Gomez-Pieters.

Ambos alto funcionario oficialmente lo asumi e cargo di nan respectivo departamento cuminsando prome di Mei proximo.

Segun e mandatario di finanzas e funcionnan aki ta wordo cualifica como ‘sensitivo’ pues tur dos candidato mester pasa den un ‘screening’ riguroso cual mester duna resultado positivo prome cu nan nombramento wordo formalisa.

E dos departamentonan aki ta sumamente importante no solamente pa Ministerio di Finanzas pero pa henter e aparato Gubernamental ya cu ta nan ta genera entrada pa e caha di Gobierno. Pa es motibo tambe Minister Bermudez a enfatisa cu tanto Departamento di Aduana y Departamento di Impuesto mester funciona debidamente y den forma optimal bou di un maneho structural, pa nan por funda nos presupuesto optimalmente.

Fuera di e dos fiscalistanan aki, esta Sra. Gomes y Sr. Croes, ambos director temporalmente lo conta cu e sosten di 2 ex-director di e departamentonan menciona den persona di sra. mr. Jane Jansen y sr. mr. Leandro Bernadina respectivamente. Sra. Jansen y Sr. Bernadian tin experencia amplio y conocemento di e departamentonan.

Ademas e director interino actual di Departamento di Aduana Sr. mr. Julian Lopez Ramirez, lo keda encarga como consehero pa loke ta trata e parti di reorganisacion di e departamento, a base di e “Plan di Maneho Strategico’’ cu a wordo concipia tempo cu a separa e departemento aki for di SIAD.

Debi na e amplio experticio den e tereno cu cobransa, e Directora interino actual di Departamento di Impuesto, esta Sra. mr. Diana Croes lo funhi temporalmente como ‘Bijzondere Invorderaar’ na e departemento aki.

Minister Bermudez a indica di ta hopi satisfecho cu e aporte di e expertonan menciona pa cu e directornan nobo, ya cu ambos Director lo tin un tarea grandi y hopi pisa pa realisa. Departamento di Impuesto sigur lo enfoca riba e cantidad grandi di retrasonan existente como tambe e reforma di e leynan cu ta na caminda, mientras Departamento di Aduana tambe lo conta cu un reorganisacion fundamental pa funda nan structura moderno, unda cu cuerpo di duana lo bay muda pronto, ya cu e ubicacion actual no ta acceptabel mas pa nan funciona eyden.

Minister di Finanzas Angel Bermudez ta desea Director di Departamento di Aduana, mr. Roderick Croes y Directora di Departamento di Impuesto, mr. Luenne Gomes-Pieters, tur clase di exito pa e retonan grandi cu nan funcion nobo ta trece cun’e. E mandatario ta sigur cu hopi dedicacion, perseverancia, pasenshi, trahando duro y cu e sosten di tur e profesionalnan cu tambe ta forma parti di e ekipo aki, pronto nos lo conoce dos departamento actualisa, modernisa y funcionando optimalmente, manera debe ser pa pais Aruba.

Expresionnan haci den e articulo aki no necesariamente ta refleha opinion di ArenaPoliti.co