Den e protocol firma dia 2 di mei 2015 gobierno di Aruba a acorda cu Hulanda, cu Hulanda formalmente lo ehecuta control financiero riba nos Pais. Ronald Plasterk a haci un declaracion na medionan di comunicacion, na unda e ta relata: “een akkoord dat het eiland toch onder toezicht plaatst. Formeel komt er een apart college toezichthouders,  waarin ook een Arubaan zitting neemt, maar de praktische uitvoering wordt gedaan door het College Financieel Toezicht dat vanuit Curaçao toezicht houdt op de andere eilanden”.

E pueblo di Aruba masalmente a apoya e lucha di sr. Betico Croes d.f.m. pa deshaci di e burocracia y dominio di e pais Corsow den e Antiyas di Seis. E lucha tabata tin como meta primordial pa Aruba haya e oportunidad di ehecuta su propio plan di maneho pa mehora e posicion economico/social di su ciudadanonan. Y e vision di sr. Betico Croes  pa un mihor Aruba a wordo realisa tambe, pasobra despues di e Status Aparte Aruba a conoce un desaroyo economico explosivo. Aruba tabata e ehempel pa e resto di Islanan den Caribe.

Ta obvio cu e Status Aparte tabata “een doorn in het oog” di Hulanda, pasobra enbes di controla un Pais (Antias),  awor aki mester a debati cu dos organo/gobierno separa.
Ta conoci cu na 10-10-10 Antiyas a stop di existi y Hulanda a hayé e ora ey cu diferente isla y responsabilidad. E meta di Hulanda semper tabata pa sigui cu e maneho di influenciá e gobiernonan di tal forma cu e poder lo a keda na Den Haag, y cu e rijkswet firmá na 10-10-10 y e protocol firmá dia 2 di mei 2015, Hulanda a logra su meta, esta e control total atrobe ariba tur e islanan den Caribe.
Aruba ta e ultimo cu mester a doblega pa motibo di terkedad di nos gobernantenan, pa no pensa cu kizas ta trata aki di algo premedita di nos gobernantenan.

E ta un berguensa y un lastima cu e gobierno actual di Aruba a entrega e autonomia financiero di nos Pais. Pa colmo un entrega di autonomia sin a ricibi un cen preto manera cu sí a tuma lugar cu Corsow y St. Maarten. Pero loke hopi hende no ta comprende ta e embergadura di e protocol aki pa nos economia.
Hulanda tin como meta principal pa mehora su mesun situacion financiero. Historia a mustra esaki den pasado na diferente ocasion: LAGO a sera su portanan na Aruba y a habri un refineria na Pernis/Hulanda, gobierno di Hulanda a stop e companianan Hulandes cu a establece un “postbus firma” na particularmente Corsow, pa habri esakinan na Hulanda mes (Hulanda ta conoci como e "belastingparadijs" di Europa). Y den ultimo añanan, uzando e fantasia y locura di Mike Eman di laga Aruba fungi como un "Hub entre Hulanda/ Europa", Hulanda MES a bin ta haci su mesun "hub-nan" directamente den America Latina, manera na Colombia, Panama y Brazil (pronto ta Cuba). Y no lubida e rol cu Hulanda a hunga ultimamente den e caso di “El Pollo”, pa despues sera un deal miyonario cu Venezuela pa traha boortoren.
Cu e control total di Hulanda riba nos isla, nos a acepta cu Hulanda a mara e posibilidad pa nos mes desaroya nos economia na man cu pia. Nos ta back na un situacion cu nos tabata aden prome cu nos a realisa nos Status Aparte.
E burocracia di Hulanda via nan kantoor na Corsow (esey ta loke mi ta compronde for di e declaracion di Plasterk) lo hiba nos back na e Antiyas di Seis. Y awor no den gara di Willemstad, pero den gara di Den Haag, y si nos no watch-out, mayan den gara di Brussel.
Hulanda contento, pasobra ela logra su meta, pero Aruba lo bay conoce un deterioro di su posicion economico, y lo wordo rebaha na e rol di mendigo, dependiendo di Madre Patria.
Boneiro ta experenciando caba cu, awor cu e ta cay directamente bou di e mandato Hulandes, su ciudadanonan ta wordo categorisa NO como "tweederangsburger", pero como “derderangsburger”!


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, mei 6, 2015

Expresionnan haci den e articulo aki no necesariamente ta refleha opinion di ArenaPoliti.co