Diaranson parlamento di Aruba a sigui cu e tratamento di impuesto cu cartera di Minister Sevinger y Minister Hooijboer. Den e reunion aki permiso, otorgamento di tereno, tawata temanan central treci padilanti door di fraccion di MEP. Parlamentario Dangui Oduber a basa su disertacion riba e rey di permiso. E la presenta un cantidad di prueba con minister Sevinger ta haci fiesta cu propiedad di pueblo. Amigonan ta haya tereno di pueblo y ta pone nan riba mercado pa bende.

Parlamentario sr. Besaril na su turno primeramente a para keto riba maneho di integracion di Minister Sevinger. Sr. Besaril a elabora cu conforme e Memorie van Toelichting di e presupuesto, dicho maneho ta basa riba e principio di "Diversity within Unity". E maneho tin entre otro como punto di salida cu e norma y balornan general cu tur bon ciudadano mester posee na Aruba lo wordo stimula. E pregunta central a bira "Con e Minister tin pensa di logra e meta aki?" Enbista cu den e mesun Memorie van Toelichting ta solamente hasi mencion di un Examen di Idioma pa esnan cu kier keda na Aruba pa mas cu 3 aña y nada mas. Un di e obhetivonan cu e maneho aki kier alcansa conforme Gobierno, ta e mehoracion di servicio y un trato mas humano pa e migrantenan. Un biaha mas sr. Besaril a lansa e pregunta "Con e Minister tin pensa di logra esaki?". Basa riba e resultado di e Rapport di SER di November 2014, por papia mas bien di un "Ley di Palanca" (depende si bo tin coneccion den Gobierno) y no un trato husto basa riba respet y derechonan general. Por Ultimo, pa loke ta e Ministerio aki, Parlamentario Besaril a puntra Minister Sevinger. pa ki tempo Staten por spera e concepto di ley di ordenansa nobo cu ta regla Asuntonan di Stranheria na Aruba. Sr. Besaril a ilustra cu e concepto di ley aki tin 5 aña para y un di e problematicanan serio di ordenansa actual ta e cuestion di autoridad pa eherce control riba esnan cu no tin nan permisonan na ordo. Simplemente, Aruba no por sigui den un maneho sin control.

Lider di Fraccion di MEP a hasi pregunta tocante e scol di HAVO/VWO cu ainda e gobierno di AVP no tin fin di traha. Ta trata di un proyecto cu gobierno di MEP a laga cla Na anja 2009. Sinembargo gobierno a cambia na 2009 Y gabinete Mike Eman a usa tur e placa den e tram. Gobierno atrobe a bin cu storia tras di storia, pero nada concreto ki dia Noord ta haya su scol HAVO/VWO.

Expresionnan haci den e articulo aki no necesariamente ta refleha opinion di ArenaPoliti.co