Diaranson mainta parlamento di Aruba a caba cu tratamento di presupuesto di pais aruba pa anja 2016. Un presupuesto caminda gobierno di Mike Eman kier sigui fuesta riba custia di pueblo. Den e presupuesto di anja 2016 nos ta nota cu e gastonan di gobierno ta subi, e debe di pais Aruba ta sigui crece y e interes cu nos pais ta pagando na prestamonan tambe ta sigui crece. Envez cu gobierno ta reduci su propio gastonan y mustra boluntad pa soluciona e problemanan financiero di nos pais gobierno ta scohe pa aumenta impuesto directo riba lomba di pueblo y comercio. No solamente nan ta aumenta impuesto directo sino tambe impuesto indirecto lo conoce un aumento. E placanan aki mester bin di un caminda y ta for di pueblo e ta wordo saca un biaha mas.
Ora ta trata pueblo ni fraccion di AVP ni gabinete Mike Eman 2 no tin oido pa pueblo. Durante tratamento di presupuesto 2016 fraccion di MEP a presenta un cantidad di mocionan durante e reunion aki. Lamentablemente nos mester constata cu fraccion di AVP NO tin madurez politico ora ta trata temanan cu ta na biniestar di e pueblo aki. Un di e mocionan cu nos a presenta ta pa urgi gobierno pa reduci e tarifa di recohe sushi di 25 florin pa 10 florin cual ta un tarifa hopi mas social y cu tur hende por carga esaki.  E otro parti di e mocion ta pa exonera pensionadonan y esnan di menos recurso pa paga pa e servicio aki.
Ora MEP presenta solucionan mesora nan ta wordo boicotea pa e inmadurez politico di fraccion di AVP. E hendenan aki ta kere cu ora nan bai contra un mocion asina cu ta na biniestar di e pueblo ta MEP nan ta perhudica lubidando cu ta e pueblo nan ta perhudica. Na momento cu nos presenta solucionan pa problemanan di pais tampoco ta bon pa AVP. Ora MEP ta critica y cuestiona gobierno di Mike Eman no ta bon. Ora nos ta cuestiona e gobierno aki tampoco ta bon. Ora nos presenta solucionan pa problemanan manera ta e caso aki di cobra pueblo pa recohe sushi tampoco ta bon. E or abo mester puntra bo mes, kiko fraccion di AVP kier anto.
A yega e momento pa nan reflexiona kiko nan a haci cu e pais aki y stop di ta ignorante pa e problemanan serio di nos pais. E pais aki no a progresa, e hende, e ser humano no a conoce un Adelanto financiero. Su situacion financiero no a progresa y e costo di bida ta mas halto cu nunca. Placa simplemente no ta yega famianan mas pa por hiba un bida digno riba e pais aki. Envez cu gobierno ta pensa con pa alivia e pueblo nan ta pensa con nan por saca mas placa for di cartera di pueblo.
Loke nos no ta compronde ta con fraccion di AVP por ta contra pa pueblo paga envez di 25 florin, 10 florin. Un alivio pa cartera di pueblo ta wordo boycotea pa fraccion di AVP pasobra ta trata un mocion di MEP. Den un pais cu tanto problema financiero, cu tanto pobreza, cu tanto desempleo no tin espacio pa weganan politico politico di parti fraccion di AVP y tampoco infantilismo. Si nos kier drecha e lugar aki, tur hende mester por yuda drecha e pais cu a wordo lagan a werki pa gabinete Mike Eman 1 y 2.

Expresionnan haci den e articulo aki no necesariamente ta refleha opinion di ArenaPoliti.co