ORANJESTAD - Diaranson anochi Minister di Finanzas, Angel Bermudez a forma parti di ‘Co-lab” su sesion tocante impuesto. Segun e mandatario e la acepta e invitacion aki cu hopi entusiasmo pues e actividad aki ta uno caminda e por interactua cu e profesionalnan hoben y na mes momento comparti su conocemento, su experiencia y sigur kico tur lo tuma luga den un futuro den e tereno di impuesto.

 “E tabata un reunion hopi ameno, unda cu e participantenan cu ta traha den diferente sector a comparti nan opinion, varios pregunta y nan experiencia personal cu asuntonan di impuesto. Nos a tene discusionnan hopi constructivo riba e tema aki”, Minister Bermudez a splica.

E grupo aki di Co-Lab tabata hopi actualisa riba desaroyonan actual den e tereno di impuesto, pues e debate y discusionnan cu a tuma luga tabata specificamente den area di e Reforma Fiscal, implementacion di ABB como tambe tur aspecto cu mester tene na cuenta ora di cuminsa cu bo mesun negoshi.

Ademas e mandatario a indica cu e intencion di e reforma aki ta pa facilita e procesonan, modernisa e dinamica anticua cu ta wordo uza actualmente y na mes momento e la haci enfasis riba e generacion nobo cu ta esun cu ta bay desaroya y mantene e sistema moderno di impuesto cu ta na caminda.

Finalmente e mandatario a keda hopi contento di por a participa na e actividad aki, como tambe e iniciativa aki di parti di e generacion di profesionalnan hoben. E mandatario a reta e grupo hoben aki pa expresa nan experiencianan cu nan ta encontra ora nan ta purba establece como profesional y ademas vocifera cual lo ta posibel facilidadnan fiscal cu por sostene nan den nan afan.

Expresionnan haci den e articulo aki no necesariamente ta refleha opinion di ArenaPoliti.co