Health Care Conference Aruba 

ORANJESTAD – Den fin di siman aki preparacionnan ta andando pa e prome Conferencia di Cuido Medico Aruba. Dialuna mainta nos isla ta reuni algun di e figuranan mas prominente y maneho di institutonan riba tereno di cuido medico. For di Europa, Caribe, Norte y Latinoamerica ta yegando specialista y expertonan pa papia di e retonan cu mundo medico ta afronta y con por yega na solucionnan.

Hopi ta califica e iniciativa di IPKO un exito ya cu tabata na su luga pa nos pais habri un discussion entre sector politico, di maneho medico cu ta habri caminda pa mehoracion riba e tereno aki. Gabinete Mike Eman II pa medio di Minister di Salud dr. Alex Schwengle tin e organisacion di e evento bou di su encargo. Cu un registracion cu mester a cera algun dia atras, cu 250 participante, tur cos ta indica cu en berdad e resultado ta bay ta uno hopi positivo y probechoso pa tur partido.

E programa ta consisti di cuater topico discuti durante sesionnan plenario y di discussion. Riba e prome dia e tema ta Sistema di Cuido Medico den Comunidadnan Chikito (Region Caribense), e di dos dia ta bay papia di Enfoke riba Produccion pa Cuido Medico cu Enfoke riba Calidad. Diaranson dia 3 di juni e tema ta Di Cuido Dividi pa Cuido Integral (Holistico) y riba e ultimo dia ta trata Colaboracion den y entre miembronan di Reino Hulandes.

Teniendo na cuenta e ultimo topico y e potencial grandi cu tin den dje, mandatario di diferente isla y pais ruman den Reino ta presente pa e conferencia aki. Minister di Salud Publico di Hulanda Edith Schippers lo tey, como tambe su homologo di Corsou dr. Bernard Whiteman y Minister di Finanza di St. Maarten, Martin Hassink. Gabinete Mike Eman II ta probecha di e oportunidad aki pa tene un reunion paralelo na e conferencia caminda por trata diferente topico riba nivel di gobierno.

Despues di e apertura, James Fitzgerald, B.Sc.(Pharm), Ph.D, M.P.S.I., como Director di Sistema y Servicio di Salud pa PAHO/WHO ta hiba palabra. ‘Wishes vs. Resources’ ta e tema cu e lo trece dilanti.  Den su funcion Fitzgerald ta responsabel pa supervisa e trabou di PAHO su programa riba polisa y maneho publico di salud, sistemanan di salud y organisacionnan di servicio, recurso humano pa salud, financiamento y aceso na remedi y tecnologianan orienta na e Universal Health Coverage. E ta e autor y co-autor di numeroso articulo y ta miembro di un cantidad di sociedad profesional y gruponan di conseho asocia cu e profesion y area di salud.

Tur reunion y actividad relaciona cu Health Care Conference Aruba ta tuma luga entre 1 pa 4 di juni na Renaissance Convention Center.

Expresionnan haci den e articulo aki no necesariamente ta refleha opinion di ArenaPoliti.co