Gabinete ME II: Aruba ta e prome pais na mundo cu ta introduci proyecto inovativo ‘Happy Flow” na aeropuerto
Door di uzo di biometria e pasahero ta wordo procesa hopi mas lihe
ORANJESTAD – Durante un ceremonia bunita na unda tabata reina un ambiente positivo, e proyecto inovativo “Happy Flow” a keda inaugura. Invitadonan di varios pais na mundo tabata presente pa ta parti di e echo unico y historico aki. Sigur si tene na cuenta cu Aruba ta e prome pais na mundo cu ta introduci e sistema aki. E compania Vision Box di Portugal a instala e portanan automatico pa procesa pasaheronan (Happy Flow Project) na Aeropuerto International Reina Beatrix. Un proceso cu ta bay mas lihe y comodo cu loke tin awor. Aruba un bes mas ta marca pauta.
E Happy Flow Project ta hopi mas cu solamente e control automatico na frontera y ta encera henter e trayecto cu e pasahero ta pasa aden for di momento cu e check-in te momento cu e aborda su avion. E sistema ta liga tur e fasenan aki na otro via e uzo continuo di e sistema biometrico. Ora cu a firma e contract cu e compania Vision Box Prome Minister a bisa cu e ta un paso mas cerca den logra e meta di Aruba pa haci e isla un hub den Caribe. Aruba Happy Flow ta resultado di un esfuerzo cooperativo entre gobierno di Aruba, di Hulanda, aeropuerto di Aruba, Schiphol Group, KLM y FDA.
Prome Minister Mike Eman, e motor grandi tras di e proyecto aki, a bisa cu ta pa algun aña caba Aruba ta trahando duro cu partnernan di aki mes y den Reino pa mira con pa capitalisa riba e posicion strategico cu Aruba tin den mundo. “Pa realisa un posicion mas prominente pa nos isla, pa aeropuerto y pa futuro di e hendenan di Aruba, nos a wak e oportunidadnan cu tin dentro di e contexto di loke Aruba tin di ofrece. Mirando un bes mas nos posicion strategico y nos bon relacion cu Reino y e relacion special cu nos tin cu nos bisiñanan den henter e continente Mericano y Latino-America, a bira masha obvio cu Aruba por haci mucho mas cu bira un hub entre e continentenan.” Gobierno di Aruba a aserca gobierno Hulandes, KLM, Schiphol Group pa mira con sigui padilanti. Mescos cu nos tin e Pre-Clearance Mericano como un di e seis paisnan na mundo, nos kier desaroya un Pre-Clearance Europeo na Aruba. Hopi lo pensa cu esaki ta algo imposibel pa logra.” Eman a pidi e invitadonan pa wak na nan man drechi y mira un di e parke solarnan mas grandi den Caribe y na man robez un aeropuerto sofistica y inovativo, anto tur por saca e conclusion cu nada ta imposibel pa logra, si bo haci esfuerso pa logra loke bo kier. “Mi ta spera cu hunto cu mi boso ta yega na e conclusion cu si nos kier logra un Pre-Clearance Europeo aki, si nos pone nos mente y energia pa logra nos meta, nos ta logr’e.”
Eman: “Si bo tin un vision y bo tin tremendo partnernan manera nos a trece hunto pa realisa loke mi ta yama e prome fase di e Pre-Clearance Europeo cu e portanan automatico di Vision Box, anto mi ta mas cu convenci cu dentro di algun aña nos ta para hunto aki pa habri e Pre-Clearance Europeo na Aruba.”
E discurso di Prome Minister Eman a wordo masha bon ricibi y e oradornan despues di dje tabatin solamente palabranan di elogio pa su forma di proceder, su vsion pa a logra e proyec to Happy Flow na Aruba. Manera maestro di ceremonia Ruben Garcia a bisa corectamente :”Aruba un bes ta frontrunner den mundo.”
Expresionnan haci den e articulo aki no necesariamente ta refleha opinion di ArenaPoliti.co