Nos a tuma nota di e defensa baho y bou nivel cu Minister De Meza a scohe pa defende su mes contra e abuso cu placa di belasting cu a keda exponi y cuestiona pa nos Lider y collega parlamentario sra Evelyn Wever-Croes. E defensa baho y vil aki ta nada mas cu prueba cu Minister De Meza tin cos di sconde.

Record di belasting no ta limpi
E ta conoci cu na momento cu un politico keda eligi pa bay forma parti di e gobierno di nos Pais, un screening ta tuma lugar pa verifica si e politico aki ta den 'good standing' na Departamento di Impuesto. Cu otro palabra, esun cu ta bay keda nombra como minister di nos Pais mester tin un record limpi na Servicio di Impuesto y no por ta debe of no ta pagando belasting. Den caso di Minister De Meza nos por constata cu e compania MEM Consultancy NV di cual e mandatario aki tabata director, tres siman promer cu Minister De Meza a huramenta como minister di nos Pais, tabata deal pa yega na un areglo di pago pa loonbelasting atrasa y pago di boet pa incumplimento cu nos leynan di belasting. Minister De Meza poco dia pasa mes a confirma cu su compania tabata debe loonbelasting y esaki ta muestra cu e mes ta admiti cu su record na Servicio di Impuesto no tabata limpi.

Conflicto di interes grandi
E mandatario a bin cu un storia cu no ta su compania pero Valero ta esun cu a bay pidi e rebaho di belasting pa contratistanan manera su compania MEM. Si ta asina anto e ora mas remarcabel ta bira e conflicto di interes entre e mandatario aki y Valero. Ya cu e mesun Valero cu a yuda e compania liga na Minister De Meza pa haya rebaho di belasting y boet na 2009, despues ta bira haya 76 miyon florin di placa di Pueblo na 2010 cu participacion di Minister De Meza como Minister di Finanzas di nos Pais den e deal aki. E asunto aki ta hole conflicto di interes di lew y bo no mester ta porco ni cabaron den lodo pa por reconoce e holor.

Haci drechi y contesta pregunta
Minister De Meza mester haci Pueblo un fabor di tene nivel di politica na e Pais aki na halto y stop cu e politica di nivel abou y vil di yama hende pa porco y cabaron djies pa purba spanta tur balente cu ta cuestiona su abusonan di poder como minister. Nos ta urgi Minister De Meza pa cuminsa haci drechi y contesta e preguntanan oficial cu parlamentarionan di e Pais aki ta haci na dje y brinda transparencia den e asunto di rebaho di belasting aki. Pasobra ya caba Minister De Meza tin riba dje e mancha di e MEGADEBE, e mancha di HEDGING y ta bisto cu e ta mancha tambe cu FIXMENTO di belasting.

Expresionnan haci den e articulo aki no necesariamente ta refleha opinion di ArenaPoliti.co