Vision noble y grandi di MEP ta continua!

“Pisca gutu ta muri pa su boca” y “cacho ta nenga weso, pero ta weso mes e ta come” ta dos dicho popular den e pais aki. E dichonan aki ta 100% aplicabel pa partido AVP, ya cu nos tur por a mira con e politica negativo y di destruccion di e partido aki contra un proyecto visionario di MEP, ta desemboca finalmente den un brasamento formal y aceptacion di e mesun proyecto aki cu nan a demoniza pa añanan largo.
Aki partido MEP ta referi na e anuncio fin di siman pasa cu Minister Otmar Oduber hunto cu e Presidente y CEO di Schiphol Group a firma e extension di e acuerdo cu Schiphol Group pa un periodo di 5 aña mas. Kico? Schiphol Group?

Agitacion y instigacion
Kende no ta corda con - durante e famoso 8 añanan di gobernacion di MEP – e politiconan di AVP a demoniza Schiphol Group formalmente tempo cu nan a ser treci Aruba pa maneha nos Aeropuerto Reina Beatrix?  Kende no ta corda con e politiconan di AVP a expresa nan mes den forma denigrante contra e compania Hulandes, bisando entre otro cu MEP a bende Aruba cu Hulanda na prijs di baca flaco? Kende no ta corda con e politiconan di AVP a agita y den forma denigrante a ataca malamente e director di Schiphol Group, esta sr. Steinmetz, ya cu den terminologia di AVP e director aki ta un macamba?  Asina nos por sigui relata tur e agitacion y instigacionnan cu AVP a fomenta contra e compania Hulandes y pa no lubida cu AVP a priminti pueblo cu asina cu nan drenta gobierno nan lo kibra e contract cu Schiphol Group.

Un exito rotundo
Sinembargo Gabinete Oduber mediante di ex-Prome Minister Nelson Oduber y ex-ministro di Turismo Eddy Briesen tabata tin un vision grandi pa cu e Aeropuerto di Aruba y nunca nan a ser descurasha pa trece Schiphol Group Aruba y pa maneha nos Aeropuerto. Finalmente e vision aki – mescos cu e vision di un hotel di 5 strea, Ritz Carlton - a resulta den un exito rotundo ya cu den e ultimo añanan nos Aeropuerto a haci ganashinan exorbitante y mas cu tur, henter e modernisacion necesario di nos Aeropuerto a ser implementa door di Schiphol Group y di cual nos tur como Arubiano mester ta hopi orguyoso di dje. Anto ainda tin hendenan ignorante den AVP cu ta bisa cu durante 8 aña di Gabinete Oduber nada a ser haci den e pais aki?
Awe cu orguyo partido MEP ta mira con e gobierno actual a dicidi di no kibra e contract cu Schiphol Group, pero alcontrario pa extende esaki cu 5 aña mas. Awe nos tur ta contento, ya cu un y tur den nos comunidad ta gana cu presencia di Schiphol Group na Aruba y ta mira e frutanan cu e grupo aki ta laga atras.

Expresionnan haci den e articulo aki no necesariamente ta refleha opinion di ArenaPoliti.co