Conclusion di un estudio haci riba peticion di Ministerio di Asuntonan di Exterior y Relacionnan di Reino  

Oranjestad – Un cantidad creciente di companianan Hulandes tin interes grandi pa haci negoshi cu Latino-America via e parti Caribense di Reino. Esaki ta resultado di un estudio cu a wordo haci door di SEO (SEO Economisch Onderzoek) riba peticion di Ministerio di Asuntonan di Exterior y Relacionnan di Reino. Un estudio cu ta confirma e intencion di Gabinetenan Mike Eman pa desaroya Aruba como un hub comercial dunando e tur razon di existencia. E estudio haci (SEO) su enfoke tabata for di e perspectiva di experiencia y necesidadnan di companianan na Hulanda y riba e islanan, pa contribui na e discusion riba e siguiente pasonan pa tuma y e reglanan di maneho cu ta dirigi riba e siguiente desaroyonan di comercio den (e parti Caribense di) Reino cu Latino-America.

Mayoria di esnan cu a participa na e estudio a duna di conoci cu nan tabatin experiencia cu e bareranan den comercio den Latino-America. Esaki ta e impuestonan halto y e proceduranan largo y trabahoso di importacion. E empresanan Hulandes ta experiencia mas barera den Latino-America cu companianan di Aruba, Corsou y Boneiro ta experencia. Di e 35 empresanan Hulandes cu ta haci negoshi cu Latino-America, cuatro ta haci uzo di e facilidadnan y servicio den e partinan Caribense di Reino y diezun ta pensando pa haci mescos. E motibonan principal cu a wordo duna pa haci negoshi via e islanan ta: conocimento di e cultura Latino-Americano (di haci negoshi), presencia di un netwerk di empresanan den Latino-America cu cualnan por haci negoshi y e infrastructura financiero ya existente riba e islanan. Pa e inversionistanan Hulandes haci negoshi cu Latino-America via e parti Caribense di Reino ta interesante door di presencia di e Zonanan Liber, e facilidadnan portuario y presencia di benta di actividadnan di match making. E empresanan Hulandes ta neutral te positivo pa loke ta e facilidadnan y prestacion di servicio di e islanan. Dunamento di servicio fiscal y huridico ta haya un acogida masha positivo; e aeropuertonan, wafnan y e leynan fiscal ta haya bon acogida. E cantidad di permiso cu ta necesario pa por haci negoshi mester haya atencion y wordo mehora. E empresanan Hulandes no ta mucho contento tampoco cu e calidad di servicio di e banconan. Nan ta indica cu tin necesidad na un organisacion central cu ta duna informacion encuanto haci negoshi riba e islanan. 

Por lo general e companianan ta satisfecho cu e facilidadnan cu tin disponibel riba e islanan. E aeropuerto y waf di Aruba ta esnan cu a cay mas na agrado, na Boneiro nan no ta contento cu e waf. Pa loke ta Aduana nan ta mas satisfecho cu esun di Bonerio cu esnan di Aruba y Corsou. E E zone di Aruba y Corsou a haya hopi bon puntuacion den e estudio haci. E puntonan cu mester atencion ta e posibilidadnan di transporte, falta di un punto central di informacion y e falta tambe di concurencia entre e banconan.  

Expresionnan haci den e articulo aki no necesariamente ta refleha opinion di ArenaPoliti.co