E maneho di Green no a trece ningun beneficio extra pa Aruba! 

Cu nos economia ta stanca completamente ta un realidad cu ta bisto pa un y tur den nos comunidad. Esaki a ser vocifera tambe pa entre otro Camara di Comercio cu recientemente a declara cu durante e promer kwartaal di 2015, e cantidad di negoshinan nobo cu a inscribi na Camara di Comercio no a conoce ningun adelanto, compara cu e promer parti di 2014. Tambe nos por mira con Banco Central gradualmente ta ahusta su proyeccion pa loke ta e cifra di nos crecemento economico. Den nan relato di November 2014, nan a proyecta cu e crecemento economico pa 2015 lo bay ta 2.9%. Sinembargo den nan update na januari 2015, esaki ya a disminui te cu 2.4%.

Pero locual tin partido MEP mas preocupa ta cu ya nos a yega na e di dos parti di 2015 (juni 2015) y te ainda nos no ta mira ningun moveccion pa cu realisacion di un crecemento economico mas fuerte durante e aña aki. Alcontrario, nos por mira cu construccion di hotel Bahia Principe na San Nicolas no a inicia manera cu a wordo bisa, esta dia 1 di februari 2015, pero cu aparentemente esaki lo bay sosode te aki 4 pa 5 luna, pues te casi na final di 2015. Tambe e plannan pa tur e otro hotelnan, e.o. den Caya grandi di San Nicolas, Caya Betico Croes na Oranjestad, Tiera del Sol, Isla de Oro cu gobierno ta propaganda, casi ningun di nan no tin ni mapa pinta ainda, corda pa papia di inicio di construccion den e aña aki. E hotel Radisson – despues di su benta – ta bay den renobacion e aña aki. Ariba dje, e parke Urirama lo no wordo construi y consecuentemente esaki no ta genera ningun actividad economico mas. Otro proyectonan grandi manera Green Corridor, Ringweg, Smart Community na Kibaima, ex-Bushiri hotel, John F. Kennedyschool, construccion di garashinan di parkeer ta completamente stanca, anto bon stanca. Turismo crucero sorprendemente a cay e aña aki, turismo stay-over su calidad ta bahando y e refineria ainda ta cera. Y riba dje mester tene cuenta cu tur e 28 medidanan cu ainda mester ser implementa door di Gabinete Eman y cu lo tin su efectonan negativo pa e poder di compra den nos pais.

Ta pesey lo ta recomendabel – mirando cu ya nos a yega na mitar di 2015 – pa Banco Central evalua e situacion y bolbe duna un update di e cifra di crecemento economico y p’asina ningun instancia y persona bolbe wordo sorprendi cu un ahustucion drastico di e cifra di crecemento economico, manera cu a sosode aña pasa ora cu Banco Central mester a corigi drasticamente su propio cifra di crecemento economico.

Ta bisto cu e gobierno actual desde 2010 a pone tur enfoke riba green, green y mas green, pero e greennan aki no ta trece ningun progreso pa nos economia.

Expresionnan haci den e articulo aki no necesariamente ta refleha opinion di ArenaPoliti.co